Qaraǵandy oblysyndaǵy sý tasqyny kezinde úıleri jaramsyz bolyp qalǵan turǵyndardyń barlyǵyna birdeı memlekettik búdjet esebinen baspana turǵyzylmaıtyn boldy. Bul týraly «Qamshy» portaly Azattyqqa silteme jasaıdy. Búlingen úıleriniń qujattary tolyq emes otbasylarǵa japa shekkenderdi qoldaý qorynan bólingen qarajat esebinen basqa jerden baspana salynbaq.
«Qor» dep otyrǵanymyz - ákimshiliktiń uıymdastyrýymen jurttan jylý jınaý maqsatynda ashylǵan «Qaraǵandy oblysyndaǵy tasqynnan zardap shekkenderge kómek qory».
Qaraǵandy oblysy, Buqar jyraý aýdanynyń basshylyǵy sáýir aıynda bolǵan tasqynnan búlingen úılerdiń arasynda «problemalyq úılerdiń» bar ekenin rastaǵan. Burynǵy qojaıyndary Reseıge ne Germanıaǵa kóship ketken, al jańa ıeleri qujattaryn ózderine rásimdemegen, keıbir úılerdiń tipti qujaty joq. Zań boıynsha, úılerdi búdjet esebinen buzyp, ornyna jańasyn salýǵa bolmaıdy. Sondyqtan ákimshilik muny halyqqa eskertken. Degenmen, jergilikti ókimet tasqyn kezinde úıi qıraǵandardyń bir de biri dalada qalmaıdy dep ýáde bergen. Endi olar máseleni basqa jolmen sheshpek: Qaraǵandy oblysyndaǵy tasqynnan zardap shekkenderge kómek qorynyń esebinen basqa jerden turǵyn jaılar salý josparlanǵan.
- Úıdi tek zańdy ıesiniń ruqsatymen buza alamyz. Biz olarǵa búdjet esebinen úı sala almaımyz. Sebebi erteń úıdiń zańdy egesi kelip, olardy shyǵaryp jiberýi múmkin. Sondyqtan biz qordyń esebinen [tasqyn kezinde] sol úılerde turyp jatqan kisilerge basqa jerden jańa úı turǵyzamyz. Keıin qor álgi úılerdi zardap shekkenderge tapsyrady. Quramyna 11 eldimeken kiretin Buqar jyraý aýdanynda osyndaı 63 «problemalyq úı» bar, olardyń 43-i tasqynnan eń kóp japa shekken Mustafın kenti men Nura beketinde ornalasqan, - dedi Buqar jyraý aýdany ákiminiń orynbasary Asqat Álı.
Nurzat Toǵjan
