Qazaqstannyń Bas prokýratýrasy Lıtva bıliginen  eks-bankır Áblázovtyń baldyzyn elge qaıtarýdy talap etti. Esterińizde bolsa osyǵan deıin  «Qamshy» portaly «M.Áblázovtyń baldyzy Lıtvada ustaldy» degen aqparat jaryq kórgen bolatyn.

Qazirgi ýaqytta Shalabaevqa qatysty Qazaqstanda tergeý amaldary júrip jatyr. Ol "BTA Bank" aksıonerlik qoǵamynyń 175 mıllıon teńgesin zańsyz ıemdendi degen kúdikpen izdestirilip jatyr. Bas prokýratýranyń málimetinshe, ol Muhtar Áblázovtiń jetekshiligimen qurylǵan toppen osyndaı qylmysqa barǵan. 

Esterińizge sala keteıik, eks-bankır Áblázovtyń baldyzy Syrym Shalabaev 28 shilde kúni Vılnús qalasynda ustalǵan bolatyn. Al 30 shildede Vılnústiń jergilikti soty Shalabaevty 3 aıǵa qamaýǵa alý týraly sheshim shyǵarǵan. 

2011 jyly Syrym Shalabaevty sotqa qurmetsizdik kórsetkeni úshin Londonnyń Joǵarǵy soty 18 aıǵa bas bostandyǵynan aıyrý týraly jaza kesken bolatyn. Degenmen ol sot tóreliginen qashyp, nátıjesinde oǵan Halyqaralyq izdeý jarıalaǵan.

Sonymen qatar,  Syrym Shalabaevqa Ýkraına bıliginiń suranysy boıynsha Interpol izdeý jarıalaǵan bolatyn. Ol óziniń jezdesi-sybaılasy, BTA Banktiń eks-basshysy Muhtar Áblázovpen jáne taǵy da basqa tulǵalarmen birge Qazaqstanda, Ýkraınada, Reseıde jáne taǵy da basqa elderde birneshe mıllıard dollar somasynda qarajatty ıemdenip, jaratty dep aıyptalyp otyr. Ýkraınada Syrym Shalabaev 300 mıllıon dollardyń múlkin jaratty jáne ıemdendi delinedi.

 Nurzat Toǵjan