Osy jeksenbi kúni BUU-na múshe elder jetekshileri 2015 jyldan keıingi jahandyq damý máseleleri jónindegi qujatty qabyldaýǵa kelisti. 2 jyldan beri tujyrymdamasy daıyndalyp kelgen 29 bettik qujatty rásimdeý qyrkúıek aıyna josparlanyp otyr. Bul týraly TASS habarlaǵan.

Atalmysh qujatta 15 jylǵa josparlanǵan 170 baǵyt boıynsha máselelerdi sheshý joldary  qarastyrylǵan.

Sonyń ishinde eń mańyzdysy – álem memleketterindegi kedeıshilik jáne onyń barlyq sıpatymen kúresý. Ashtyqqa ushyraǵan elderge azyq-túlikti jetkizý, salaýatty ómir salty, jynys teńdigi (genderlik teńdik), turaqty energetıkaǵa qoljetimdilik, ekonomıkalyq ósim, jańa jumys oryndaryn ashý t.b. máselelerdi sheshý joldary qarastyrylǵan.

BUU basshylarynyń bul qujattarynyń negizinde 700 mıllıonǵa jýyq adamdy kedeıdikten qutqarý maqsat etilgen. Sonymen qatar, ǵalamdyq ashtyq, juqpaly indetter, jynys teńsizdigi, aýyz sýmen qamtamasyz etý jáne sanıtarıa máseleleri de josparlanǵan 15 jyldyń kóleminde tolyq sheshiledi dep kútilýde.

«Biz adamzatty tırandardyń zulymdyǵynan, ashtyq pen aýrýdan, kedeılik pen kiriptarlyqtan qutqarý úshin, osy jáne erteńgi urpaq úshin  ǵalamsharymyzdy búgin qorǵaýymyz kerek.  Ǵalamdy turaqty bolashaqqa bastaý úshin osyndaı batyl ári mańyzdy sheshimderdi erteńge qaldyrýǵa bolmaıdy»,-deıdi BUU Bas hatshysy Pan Gı Mýn myrza.
 

NurzatToǵjan

«Qamshy» silteıdi