Qazaqstan Prezıdenti Nursultan Nazarbaev QR Mádenıet jáne sport mınıstri Arystanbek Muhamádıulymen kezdesip, «Bolashaqqa naqty 100 qadam» jobasynyń aıasynda  Qazaq handyǵynyń 550 jyldyǵyn toılaý máselelerin talqylady.  Bul týraly «Qamshy» portaly Aqordanyń baspasóz-qyzmetine silteme jasaı otyryp habarlaıdy.

Prezıdent óziniń sózinde, atalmysh datany toılaý óz deńgeıinde ótýi úshin bar salmaqtyń mádenıet mınıstrine túsetinin eskertken bolatyn.

«Osy ýaqytqa deıin memleket tarıhyn zertteıtin ınstıtýt qalyptasty. Bizdiń kóptegen tarıhshylarymyz shetelderge shyǵyp, tarıhı materıaldardy izdestirdi jáne birtalaıyn tapty da. Endi birińǵaı ult bolý úshin, sondaı-aq jastarymyzdy patrıottyqqa tárbıeleý úshin bizge Qazaqstannyń jan-jaqty tarıhy mańyzdy», - dedi  Elbasy.

Dese de Prezıdent Nazarbaev álem memleketterindegi daǵdarysty tilge tıek ete kele,  alaǵaı da, bulaǵaı shaqta, ekonomıkanyń álsirep turǵan kezeńinde handyq toıyn artyq shyǵynsyz atap ótý kerektigin eskertti. «Iá, artyq shyǵynsyz, biraq sapaly bolýy kerek. Jurttyń esinde kópke deıin saqtalatyn bolsyn», - degen Prezıdent tapsyrmasyn mınsıtr myrza bas shulǵyp, qabyl almasqa shara qaısy?!

Elbasy Nursultan Nazarbaev, sharanyń basty maqsaty ultjandylyqty nyǵaıtyp, qazaqstandyqtardyń rýhanı deńgeıin ósirý ekenin de naqtylap ótken.

Al QR Mádenıet jáne sport mınıstri Arystanbek Muhamádıuly óz kezeginde,  handyqtyń toıy Astana jáne Taraz qalalarynda toılanatynyn aıtty.

«Qazaq handyǵynyń 550 jyldyǵyn memlekettik deńgeıde atap ótý ol – qazaqstandyqtardyń birligin nyǵaıtýǵa úlken sep bolatyn aýqymdy shara. Birinshi kezekte, qazir bizdiń jiti den qoıyp otyrǵanymyz handyqtyń toıyna uıymdastyrylatyn halyqaralyq ǵylymı-praktıkalyq konferensıalar. Sonymen qatar, qazirgi tańda Taraz qalasynda etnografıalyq murajaı men ortalyq qurylysy bastaldy. Kúrdeli arheologıalyq jumystar da júrgizilýde»,-dedi mınıstr myrza.

Nurzat Toǵjan