ALMATY. Qamshy portaly - Dúnıejúzilik saýda uıymyna múshe bolý - elimizdiń saýda-sattyq álemindegi kókjıegin keńeıte túsetin qadam. Mańǵystaý oblysyndaǵy Sh.Esenov atyndaǵy KMTjIÝ prorektory tehnıka ǵylymdarynyń doktory, profesor Sembiǵalı Zákenov respýblıkalyq «Egemen Qazaqstan» gazetine bergen suhbatynda osyndaı óz pikirin bildirdi.

Jýyrda elimizdiń ishki beriktigin turaqtandyryp, qaýipsizdigin qamtamasyz etetin «100 naqty qadam» mindettemelik baǵdarlamasyn qabyldap, barar bolashaǵymyzǵa qajetti eń mańyzdy júz qadamdy anyqtaǵan elimiz úshin taǵy bir aıtýly sát oryn aldy. Ol - Qazaqstannyń Dúnıejúzilik saýda uıymy syndy álemdegi irgeli uıymǵa múshe bolyp, áleýmettik-ekonomıkalyq damýdyń jańa qyryna qadam basýy bolyp otyr.  

Álemniń 161 eli múshe bolyp tabylatyn atalmysh uıym­nyń qataryna ený bul bir-eki jyl­ǵy jumystardyń jemisi emes. Bul - Memleket basshysy N.Nazar­baevtyń memleketimizdiń álemniń aldyńǵy qatarly elderi sanatyna qosylýy úshin aldyn ala jos­parlap, is júrgizý tetikterin áý bas­tan oraılastyra júrgizgen saıasa­tynyń nátıjesi. On toǵyz jyl boıy ári pisip-jetilgen, ári syna­lyp-shyńdalǵan jospar-joba­nyń naqty sıpatqa ıe bolýy. Beıbitshiliksúıgish ustanymy jaǵynan uqsas Shveısarıa elinde, Je­nevanyń tórinde Qazaqstannyń Dúnıejúzilik saýda uıymyna múshe bolýy elimizdiń dańqy men bedelin tórtkil álemge taǵy bir tanytyp, táýelsizdigin jarıalaǵanyna shırek ǵasyrǵa jeteǵabyl ýaqyt bol­ǵan eldiń alyp armandary men asqar murattaryn, qandaı irgeli, aýqym­­dy qadamdardan bas tartpaı, ózine se­nimdi túrde alpaýyt jobalar men qadamdarǵa qaımyqpaı bara ala­tyn tegeýrindiligine tánti ete tústi.

Atalmysh uıymnyń elderdi múshelikke qabyldaý jónindegi departamenti dırektory Ch.Osakveniń jýrnalısermen ótkizgen baspasóz máslıhatynda Qazaqstannyń ustanǵan saıasatyn, el tizginin ustaǵan Elbasy N.Nazarbaevtyń kóregendigin jáne Qazaqstannyń áleýmettik-ekonomıkalyq damý qarqynyn zor yqylaspen atap ótip, Qazaqstan syndy toqyraý jyldaryndaǵy ekonomıkalyq qıyndyqtardy eńserip, alys bolashaqqa senimmen umtylǵan eldiń DSU-nyń da qýatyn arttyra túsetindigine senim bildirýi - bizdiń elimizdiń ustanǵan damý baǵyty alystaǵy aıbyndy elderdiń qoldaý-qýattaýyna ıe ekendigin, tipti, bizdiń elmen áriptes bolýǵa yqylasty ekendigin tanytty.

Prezıdent N.Nazarbaev sońǵy jyldardaǵy ekonomıkalyq áleýettiń qarqyndylyqqa ıe bolyp, eleýli oń ózgeristerdiń oryn alǵandyǵyn aıta kelip, DSU-ǵa múshe bolǵannan keıin­gi qolǵa alynýy tıis basym baǵyttarǵa sholý jasap ótti. Ol qarjy qyzmetin yryq­tandyrý, telekomýnıkasıa salasynyń qyzmet sapasyn arttyryp, qyzmet baǵasyn tómendetý máseleleri. Tabysty bolyp sanalatyn atalmysh baǵyttarǵa sheteldik ınvestorlardyń tartylýyn qamtamasyz etý máselesin de ortaǵa salyp, Qazaqstanda ınvestorlarǵa jasalatyn jaǵdaı men beriletin jeńildik-múmkindikterdi atap ótti.

Dúnıejúzilik saýda uıymyna múshe bolý Qazaqstannyń saýda-sattyq álemindegi kókjıegin keńeıte túsedi. Otandyq ónim óndirýshilerge básekelestik pen oǵan qabilettilik qajettiligi týyndap tur. Jańa jumys oryndaryn ashyp, tutynýshynyń tańdaý jáne sapaly da arzan taýarǵa qoljetimdiligin qamtamasyz etetin, sol arqyly otandastarymyzdyń áleýmettik-turmystyq ahýalyn arttyrýǵa yqpal etetin qadam bolýymen de qundy.

Zaman talaby jalqy bolyp oqshaýlanýdy emes, jalpyǵa qaraı ońtaılanýdy, ózindik maqsat-múddelerin ustana otyryp birigý men kirigýdi, álem halyqtarynyń jer shalǵaılyǵyna nemese basqa da ártúrli sebepterge qaraı san myńdaǵan bólshekterge bólinýi men ózara jutylýyna emes, judyryqtaı jumylyp, ózara yqpaldasa áreket etýin qajet etýde. Qazaqstannyń aıtýly uıymǵa múshe bolýy - memleketimizdiń nyǵaıýy, ózgelermen teń dárejede yqpaldasyp, ózgeni tyńdaı, ózin tyńdata biletin beldi memleketke aınalý jolyndaǵy sátti qadamy. Bul jetistikke bizdiń elimizde buǵan deıingi júrgizilgen izgi bastamalar men qutty qadamdardyń jalǵasy, bolashaq baıandy ómirimizge bas­tar jańalyqtardyń biri retinde senimmen qaraımyz. 

Derekkózi: QazAqparat