Jýyrda oblys ákimdiginiń konferens-zalynda Mańǵystaý oblysy ákiminiń orynbasary R.Ámirjanovtyń qatysýymen baspasóz konferensıasy ótti. Jıyn taqyryby jýyrda ótetin Iran isker top ókilderiniń saýda kórmesi jóninde boldy. Iran Islam Respýblıkasynyń Aqtaý qalasyndaǵy bas konsýly Mahmýd Adıbtiń málimdeýinshe, halyqaralyq kórme eki el arasyndaǵy ózara tıimdi saýda-ekonomıkalyq seriktestikti damytýǵa jańa serpin bermek.

Oblystyń Iran memleketimen ara­daǵy saýda aınalymy 36 mln. AQSH dollaryn quraıdy.  Munaı óndirisi, mashına jasaý ónerkásibi, qurylys jáne aýyl sharýashylyǵy salasynyń 50-ge jýyq eń iri kompanıalary aımaqta tyǵyz iskerlik qarym-qatynas ornatýdy kózdep otyr.  Shilde aıynyń 21-i men 24-i aralyǵynda  «Nur Plaza» qonaq úıinde kórme uıymdastyry­lady. Kórmege Iran memleketiniń «Iran Hýdro», «Kalle» syndy iri qurylys kompanıalary ónimderi qoıylmaq. Ári Iran isker ókilderi men jergilikti kásipkerler arasynda bıznes-forým ótedi dep josparlanǵan. 

Sonymen qatar, basqosý barysynda R.Ámirjanov Qazaqstan aýmaǵyndaǵy tór­tinshi munaı óńdeý zaýytyn salý jaıly sóz qozǵady. Elimizde Atyraý, Pavlodar jáne Ońtústik Qazaqstan oblystarynda úsh munaı óńdeý zaýyty qarqyndy jumys jasaıdy. Degenmen, olardyń munaı ónimderi ishki naryǵyn turaqtandyrýǵa, tolyqqandy qamtamasyz etýge qýaty jetkiliksiz. Oblys ákiminiń orynbasary munaı óńdeý zaýytyn Mańǵystaýda salýdyń tıimdi tustaryna toqtaldy.

– Óńir boıynsha jylyna 18 mln. tonnaǵa jýyq munaı óndiriledi. Sonymen qatar, Aqtaý jáne Quryq teńiz porty arqyly syrtqy naryqqa shyǵarý múmkindigi bolady. Aǵymdaǵy jyldyń aıaǵyna deıin óńir basshylyǵy zaýyt qurylysy týraly qujatqa qol qoımaq,- dedi ol.
Jańa jobaǵa qatysty Iran memleketi de zor qyzyǵýshylyq tanytýda.

– Munaı óńdeý zaýytyn salýda Iran memleketi óz tájirıbesimen bólisti. Iranǵa mu­naı ónimderiniń 40%-y shetten tasymaldanady. Mańǵystaýda óńdelgen munaı ónimderi Irannyń soltústigindegi teńiz porttaryna baǵyttalady. Iran munaı mınıstrligimen birqatar resmı kelissózder júrgizdik. Jobany qarjylandyrýǵa iri kompanıalar qyzyǵýshylyq tanytýda ,– dep aldaǵy jumys josparymen bólisti.  

Aqparat kózi: Mangmedia.kz.