Almaty. Qamshy portaly - Aqtaý teńiz saýda portyn soltústik baǵytta keńeıtý boıynsha joba quny shamamen 40 mlrd teńgeni quraıdy. Atalǵan joba «Indýstrıalandyrý kúninde» jalpyulttyq telekópir kezinde Elbasy Nursultan Nazarbaevqa tanystyryldy.

«Búginde úsh aılaq - astyq, konteınerlik jáne bas júkterge arnalǵan aılaqtar boıynsha jumystar aıaqtalyp keledi. Bıdaı termınalynyń barlyq alty súrlemi kóterildi, qural-jabdyqtardy montajdaý jumystary aıaqtalýǵa taıady. Tórtinshi - port flotyna arnalǵan aılaq aıaqtalýǵa jaqyn. Sonymen qatar ákimshilik nysannyń, sanıtarlyq-epıdemıologıalyq qyzmetter ortalyǵynyń, materıaldyq qoımalardyń, qural-jabdyq qoımasy men garaj irgetasy kóterilip jatyr. Kólikter úshin kirý joldary da tóselip jatyr. Jumys kestege saı júrgizilýde. 300-den astam jumysshy tartyldy. Nysandy 2015 jyldyń ekinshi jartysynda tapsyrý kózdelgen», - dedi «Aqtaý halyqaralyq teńiz saýda porty» Ulttyq kompanıasy» AQ prezıdenti Mıhaıl Ialbachev.

Onyń sózine qaraǵanda, joba aıasynda árbiri 10 myń tonnalyq 6 býnkerden turatyn astyq qambasynyń qurylysy qarastyrylǵan. Bul jylyna 1,5 mln tonna astyq tasymaldaýǵa jol ashady. Jylyna 1 mln tonna júkti óńdeıtin konteınerlik alań men árbiri 150 metrlik 3 aılaq teńiz portynyń kólik áleýetin edáýir damytýǵa septesedi.

Joba úsh kezeńde júzege asyrylady. Alǵashqy kezeń aıasynda 2006-2011 jyldary qorǵanysh qurylymdary salyndy. Qurylystyń jalpy somasy 10,82 mlrd teńgeni qurady, «Qazaqstan Damý banki» AQ qarajaty paıdalanyldy. 

Qazir ekinshi jáne úshinshi kezeńder boıynsha jumystar júrgizilip jatyr. Ekeýi de bıyl aıaqtalýy tıis. Sońǵysyn júzege asyrý úshin «Inter port development PTE.ltd» (Sıngapýr, 60%), «KTZ Express» AQ(30%), «Aqtaý MMTP» UK» AQ (10%) kompanıalarynyń qatysýymen «Aqtaý teńiz soltústik termınaly» JSHS quryldy.