Jaqynda Reseıdiń Omby gýbernıasynda turatyn etnıkalyq qazaqtar men qala turǵyndary Omby qalasynyń 299-shy týǵan kúni men Shoqan Ýálıhanovtyń 180 jyldyǵyn toılady. 

Ǵalymnyń atyna berilgen kóshede merekelik is-sharalar uıymdastyrylyp, «Etno-jaz» shyǵarmashylyq jobasy, «Dostyq jaǵalaýy» ulttyq mádenı merekesi men

Sh. Ýálıhanovtyń 180 jyldyǵyna arnap «Uly dalanyń sońǵy hanzadasy» ekskýrsıasy ótkizildi. Bul týraly «Qamshy» portaly QazAqparatqa silteme jasaı otyryp habarlaıdy.

 «Omby qazaqtary» qaýymdastyǵynyń ókili Torǵyn Áshenovanyń aıtýynsha, «Dostyq jaǵalaýy» sharasyna 40-qa jýyq ulttyq-mádenı uıymynyń ókilderi qatysqan. Qatysýshylar qala turǵyndary men qonaqtaryn Ombyda ómir súrip jatqan túrli ult ókilderiniń salt- dástúrimen, mádenıetimen tanystyrǵan.

Merekege oraı aqshańqaı qazaqtyń kıiz úıi tigilip, ol jerde qazaqtyń ulttyq taǵamdary tanystyrylǵan

Kıiz úıde Omby oblysynyń ult ókilderiniń ulttyq-mádenı uıymdary, «Shoqan joly» aımaqtyq qoǵamdyq uıymy, «Omby qazaqtary»  qaýymdastyǵynyń ókilderi qala meri Vácheslav Dvorakovskıı men Qazaqstannan atalmysh sharaǵa arnaıy kelgen qonaqtardy qarsy alǵan.

 «Men bul jerde Ombynyń naǵyz dostaryn kórip otyrmyn. Bizdiń qalamyzdyń esigi qashanda sizderge ashyq. Biz sizdermen yntymaqtastyǵymyzdy odan ári damytýǵa nıettimiz», - degen qala meri V. Dvorakovskıı alańǵa jınalǵan jurtty qala kúnimen quttyqtap kelgen qonaqtarǵa alǵysyn bildirgen.

Merekelik sharalar Qazaqstan Respýblıkasynyń Konsýldyǵynyń qasynda «Uly dalanyń perzentteri» ádebı-mýzykalyq keshimen jalǵasty.

Nurzat Toǵjan

Sýretter: QazAqparat