Almaty oblysynda turmysy nashar otbasynyń balasy memlekettik granttan qaǵylǵan. Esterińizde bolsa jergilikti basshylar Almaty oblysyndaǵy turmysy ortadan tómen otbasynyń mektep bitirýshi balasyna JOO grantyn berýge ýáde etken bolatyn Bul týraly qazaqstandyq BAQ az jazbaǵan. Endi mine, quzyrlylar «otbasyńnyń kirisi eń tómengi kúnkóris mólsherinen 10 dollar asyp ketkendikten, grant berilmeıdi» dep málimdegen eken. Bul týraly «Qamshy» portaly Azattyqqa silteme jasaı otyryp habarlaıdy.
Almaty oblysyndaǵy Moınaq kentinde turatyn Rysbek Dosannyń jasy 17-de. Otbasylyq tabystary eden jýýshy anasynyń aıyna alatyn 26 myń teńgesi ()shamamen 140 dollar) men jartylaı jetimderge memleketten bólinetin 24 myń teńge (130 dollar).
Bıyl kóktemde Rysbek turmysy nashar otbasydan shyqqan bala retinde oblys ákimi qolynan ulttyq biryńǵaı testileýden joǵary bal alsa, tegin oqýǵa kepildik beretin ataýly sertıfıkat alǵan. Ulttyq birińǵaı testileý aıaqtalyp, 83 bal jınaǵan Rysbekke ákimdiktegiler endi grant berilmeıtinin jetkizgen. Sebebi otbasynyń kúndik tabysy 10 dollardan asyp ketken- mys.
Al ana baıǵus kináni ákimdikten emes, ózinen izdeıdi. Onyń aıtýynsha naýryz-sáýir aılarynda jumystaǵy áriptesiniń ornyna birneshe márte shyǵyp, nápaqasyn eselep alypty. Sondaǵy tapqany 2000 teńge. Al zań boıynsha bul 10 dollardan asyp ketedi. Osylaısha synyqtan syltaý tapqan ákimdiktegiler jas talapkerdiń saǵyn syndyratyn sheshimge kelgen.
Almaty oblysy bilim departamenti mamandary Rysbek Dosannyń otbasynyń qıyn jaǵdaıyn túsinetinin aıtyp, biraq zań talabyn buza almaıtyn, erejeni qatań oryndaýǵa mindetti ekenin málimdegen.
Almaty oblysy bilim departamentiniń bólim bastyǵy Bolatbek Dáribaev:
— Bul sertıfıkattar oqýshylar jaqsy oqysyn, emtıhanǵa durystap daıyndalsyn degen oımen stımýl retinde berilgen. Eń basty talap - turmysy nashar otbasy bolýy shart. Rysbek Dosanǵa ataýly sertıfıkat bergen kezde onyń otbasynyń turmysy nashar sanalǵan. Biraq keıin kirisin qosymsha teksergen kezde onyń otbasynyń kiris kólemi eń tómengi kúnkóris mólsherinen asyp ketkeni anyqtaldy, - deıdi.
Al oblys ákiminiń orynbasary Bahtıar Ónerbaev myrza Rysbek Dosan sıaqty balalarǵa qatysty jaǵdaıdy «jeke baqylaýyna» alatynyn aıtqan.
Nurzat Toǵjan
