Abaı baba rýhyna

Tańdar atyp tamasha, araılana,

Qazynasyn aqtarǵan talaı dana.

Tolǵandyryp, Táńirdeı tabyntqany,

Ulylardyń ulysy — Abaı ǵana.

Kóz túrtkisiz qapasta bar aınala,

Sansyrasań jol tappaı san oılana.

Nuryn seýip janyńnyń túnegine,

Baǵyt-baǵdar silteıtin –Abaı ǵana.

Tirligińde jaǵylar talaı jala,

Júrekke ájim túsedi, solaı jara.

Jalǵyz qalyp jabyrqap júrgenińde,

Jaratqan men seneriń – Abaı ǵana.

Jalbań qaqqan saltanat saraıda ana,

Syrtqa teýip, shalqaıyp qaraıdy aǵa.

Bas-basyna bı bolǵan bar tobyrdan,

Taban tirer tilekshiń –Abaı ǵana.

Túsirmeýge kir syzyq Ar-aınaǵa,

Týra júrip jaqpassyń talaıǵa da.

Óz-ózińnen kúresip óter ǵumyr,

Myńmen jalǵyz alysqan –Abaı ǵana.

Temirqazyq — Alashqa, sharaına da,

Aspandaıdy Rýhyń solaı dara.

Árkim ózin sanaıdy danyshpanǵa,

Abaı ǵana!

            …Basqaǵa qaraılama...

***

Qaıta-qaıta Abaıǵa bas uratyn bop aldym,

Otyram da ońasha,  oılaryna qamaldym.

Baz keshkeli júrgende,  qara túnek  qursaýlap,

Syrlastym  da  bıiktep, týǵan aıdaı jańardym.

Tabysqaly  Abaımen,  kóńilimde júr órlep,

Pendelikti    tuqyrttym, ózimdi-ózim  júgendep.

Itke balap  keı dushpan, kesek  atsa syrtymnan,

Ókinbedim   ózi  de, shoshqalyǵyn biler dep.

Sergeldeńge tússem de, jan syrymdy el  uqpaı,

Táńirime táýbá  ettim, tirlik keshtim toryqpaı.

Adastym da jol ústi, tómendedim, órledim,

Baǵyt-baǵdar siltedi, Abaı-Temirqazyqtaı.

Súıdim-kúıdim, órtendim lázzátynan shól bastym,

Talaı-talaı arýdyń kóńilindegi kózdi ashtym.

Tilsiz  tilmen qushtym da kózben kórdim, túısindim,

Jalǵyzdyqtan  jalyǵyp bir sulýmen qoldastym.

Jetkizsem  dep ul-qyzdy,  “japyraǵymdy kóktetem“,

Mazalaıdy osy oılar asqaq arman joq  bóten.

“Bes asyl is, bes dushpan“ amanatym,  olardy,

Armansyzbyn  aıtsa jurt, “namysty,  adal, tekti eken“.

Bes kún tirlik  jalǵanda, jarly emespin, arlymyn,

Júregimnen ótkizem  dúnıeniń zar,  muńyn.

Din,  diline bólmesten,  túrine de tiline,

Qushsam deımin  baýyr dep adamzattyń barlyǵyn.

Ómir zańy jek kórer,  maǵan  bireý unamaı,

San asýdan óttim  de, súrinsem  de qulamaı.

Tumsyqtyǵa  shoqytpaı,  qanattyǵa qaqtyrmaı,

Aman saqtap  keledi júregimde  bir Abaı.

Serikjan QAJI