«Nur Otan» partıasy
Tóraǵasynyń birinshi orynbasary
A.I.Myrzahmetovke
Qurmetti Asqar Isabekuly!
Sanaýly kúnderden soń táýelsiz Qazaq eli Elbasy Nursultan Nazarbaevtyń bastamasymen qazaq memlekettiliginiń 550 jyldyǵyn atap ótedi.
Qarap otyrsaq, Kereı men Jánibek 1465 jyly alǵashqy handyqty qurǵannan bastap, búgingi Táýelsiz Qazaq Eline deıingi bes jarym ǵasyrdaǵy qazaqtyń bar armany – Alash jurtynyń basyn qosý, biriktirý, bir shańyraq astynda ómir súrý, bir tektilikti saqtaýdy maqsat tutypty. Barlyq arpalysqan kúres pen qyzyl qyrman qan tógis tek osy uly murat úshin júrilipti. Sondyqtan, Alash jurty úshin bul toıdyń basqa toılarǵa qaraǵanda máni men mańyzy óte zor, kóterer júgi de tym aýyr.
Qudaıǵa táýbe! Ult Kóshbasshysynyń óz sózimen aıtsaq, «Qazir óz taǵdyrymyzdy ózimiz sheshemiz. Ózimiz óndirgendi ózimiz paıdalanamyz. Bir eldiń basshysy kim bolýy kerektigi Máskeýdegi úlken kabınette sheshile salyp, buryn-sońdy qazaq jerine aıaq basyp kórmegen kóldeneń kók attylar oıyna kelgenin isteı almaıdy. Qazaq elin búginde búkil álem tanıdy, ekonomıkasynyń bolashaǵy mol, saıası ahýaly turaqty, san túrli ulttyń balasy tatý turyp jatqan órkenıetti el dep biledi, qurmet tutady. El basshysyn dúıim dúnıeniń prezıdentteri, ımperatorlary, koróldary, monahtary, premerleri, sán-saltanaty jarasqan rásimmen qabyl alady. Alýan-alýan kompanıalar men konsernder, fırmalar men qorlar ınvestısıasyn bólip, senim kórsetedi. Eń bastysy – qazaq halqy egemen eli bar, táýelsiz memleketi bar, ózgelermen teń turyp, ıyq tirestire alatyn ultqa aınaldy».
Táýelsiz Qazaqstan degende, bizdiń kóz aldymyzǵa eń aldymen onyń sý jańa Astanasy, álemdik talapqa saı bekitilgen shekarasy, shetten oralǵan bir mıllıon qazaǵy oralady!
Bizdiń Máńgilik El bolýymyzdyń eń negizi úsh tiregi – Nursultan Nazarbaevtyń osy úsh uly eńbegi bolatynyna daý bolmasa kerek!
Sol úshin de búkil qazaqtyń jany Shekara men Astananyń ústinde turýǵa tıis. Búkil bılik ataýly shettegi bes mıllıon qazaqtyń elge oralýyna qolaıly jaǵdaı jasaýǵa mindetti!
Álemdik daǵadarystar týyndatqan qıyndyqtarǵa qaramastan Astana qurlysy qarqyndy damyp keledi.
Shekara bekigenimen shekaralyq aımaqtardyń kóbiniń halqy sırep ketti. Qańyrap bos qalǵan aýyldar óte kóp. Memlketti qorǵaıtyn armıa emes, halyq. Halqy kóp eldiń qaýpi joq.
Shetten keletin Qazaq kóshi sońǵy bes-alty jylda Táýelsiz Qazaqstan tarıhynda bolmaǵan toqyraýǵa ushyrady, toqtap qalýǵa taıap baryp, aman qaldy. 2013 jyly 10 jeltoqsanda qandastarymsyzǵa tórt jylsyz azamattyq berilmeıtin etip qabyldanǵan qatań zań qazir Elbasymyzdyń tapsyrmasymen Parlamentte qaıta qaralý ústinde. Qandastarmyzdyń turaqty tirkeýge turýda, azamattyq alýda kezdesetin kedergiler joıylyp, uly kóshke qaıta jol ashylmaq.
Biraq, bul da jetkiliksiz.
Sebebi, qazirgi kezeńde Kóshi-qon saıasatymen aınalysatyn prezıdent pen Úkimetke tike qaraıtyn organ joq. Eńbek jáne halyqty áleýmettik qorǵaý mınıstrligi qarmaǵyndaǵy Kóshi-qon komıtetiniń dármeni bul sharýany atqarýǵa jetpeıdi.
Sol úshin, «Tuńǵysh prezıdenttiń kóshi-qon qoryn» qurǵan jón.
Alda kele jatqan Qazaq memlekettiginiń 550 jyldyǵyna arnalǵan mártebeli bas qosýda osy másele toıdyń kún tártibine ense, shettegi bes mıllıon qazaqtyń taǵdyry máńgilikke sheshiledi! 550 jyldyqqa arnalǵan toıdyń da mártebesi ózge toılardan asqaqtaıdy, tarıhqa altyn árippen jazylady. Sóıtip, babalar amanaty oryndalady.
Joq jerden memleket qurǵan Izraıl elge oralǵan óz qandastaryn Kóshi-qon qory qarjysy arqyly qonystandyryp kele jatqaly bir ǵasyrdan asty. Germanıada da solaı.
Osydan on úsh jyl buryn Ult Kóshbasshysy Nursultan Ábishuly Nazarbaev «Taǵdyrymyz solaı bolyp, annan qashqandardy, munnan qashqandardy Evropadan da, Azıadan da tyń jerdi kóteremiz dep, qazaqtyń sanyn azaıtamyz dep, kóp ultty boldyq. Ony kemshilik dep sanamaý kerek. Artyqshylyǵymyz dep sanaý kerek! Sondyqtan biz ár ulttyń halqyn baýyrymyzǵa basyp úırengen halyqpyz, al endi shetelden kóship kelemiz degen óz qazaqtarymyzdy baýyrymyzǵa basa almaımyz ba, sonda?! Men oılaımyn, segiz jarym mıllıon qazaq Qazaqstanda. Menińshe, qazir toǵyz mıllıonǵa jaqyndady. Sebebi, osy jyldardyń ishinde jarty mıllıon qazaq kóship keldi. Segiz mıllıondy ortasha úsh jarymǵa, tórtke bólgende, qansha januıa bolady?! Eki mıllıonǵa jaqyn bizdiń januıamyz bar. Tórt mıllınǵa jaqyn januıa eki qazaqtan shaqyryp ákep, aıaǵynan turǵyzyp jiberse, sonsha qıynshylyq bolmas dep oılaımyn solarǵa. Bul bizdiń eldigimiz bolyp sanalar edi. Dúnıe júzine biz osyndaı maǵlumat, málimet, tájirıbe berer edik! » degen boltyn. Kemeńger tulǵa taǵy bul sózin búkil Qazaqstandaǵy qazaqtarǵa arnaǵan edi. Mine, sonyń sát-saǵaty búgin týdy.
Sóz joq, jańa Qazaqstannyń bar jetistigi onyń tuńǵysh prezıdenti bolǵan Nursultan Nazarbaevtyń esimimen tikeleı baılanysty. Shettegi qandastarymyzdy Otan qushaǵyna oraltý da, joǵaryda da aıtyldy, Elbasy erte jolǵa qoıǵan uly saıasat! Qazaq, kósh endi toqtamaq emes!
Árıne, tuńǵysh prezıdenttiń atyndaǵy «Kóshi-qon qoryn» qurý «Nur Otan» partıasynyń quzyryndaǵy jumys emes ekenin biz jaqsy bilemiz. Biraq, memlekettiń eń mańyzdy saıasatyn multiksiz júrgizý, alystan kelgen aǵaıyndy partıa qataryna, Elbasy tóńiregine toptastyrý – Bas partıanyń basty qyzmetteriniń mańdaı aldysy bolýy shart. Jasyratyny joq, Bas partıa sońǵy jyldary bul jumysty aqsatyp aldy.
Qurmetti Asqar Isabekuly!
Sizdi jańa qyzmetińizben quttyqtaı otyryp, Nursultan Ábishulynyń senimdi serigi, isker tulǵa retinde, tarıhı mańyzy tótenshe zor osy máseleniń osy 550 jyldyqqa arnalǵan bas qosýda sheshim tabýyna, iske asýyna yqpal etedi dep senemin!
Barsha jumysyńyzǵa Alla sáttilik bersin!!!
Qurmetpen,
aqyn
Aýyt Muqıbek
10.08.2015
Astana
