Bıliktegi bas partıa (Nur Otan) óziniń 2014 jylǵy kiris-shyǵysy týraly esep berdi. Partıanyń resmı saıtynda kórsetilgendeı, bas partıanyń byltyrǵy búdjeti  7 mıllıard 954 mıllıon teńgeni quraǵan. Bul týraly «Qamshy» portaly «Azattyqqa» silteme jasaı otyryp habarlaıdy.

Joǵarydaǵy kórsetilgen somanyń  7,1 mıllıard teńgege jýyǵy komersıalyq emes kózderden tússe, 763 mıllıonǵa jýyq teńge komersıalyq jolmen kelgen paıda esebine tirkelgen.

Resmı aqparatta, partıanyń kirisi múshelik jarnalardan, respýblıkalyq búdjetten bólingen qarjydan, kásipkerlik qyzmet pen ekinshi deńgeıli bankterdegi salymdardan alynǵan kirister, Qazaqstan azamattary men uıymdary bergen erikti qarjylar jáne basqa kózderden quralaǵany aıtylǵan.

Partıa músheleri jarnasy 1 mıllıard 349 mıllıon teńgeni qurasa, respýblıkalyq búdjetten partıaǵa 3 mıllıard 367 mılıon teńge bólingen.

Bıleýshi partıanyń tolyq menshiginde eki komersıalyq uıym – «Nur Otan» sharýashylyq basqarmasy» (HOZÝ) jaýapkershiligi shekteýli seriktestigi jáne «NUR Medıa» holdıńi bar. Byltyrǵy jyly kásipkerlik jáne jalǵa berý qyzmetinen partıa 735 mıllıon 565 myń teńge tabys taýypty.

Ótken jyly partıanyń shyǵyny 5,4 mıllıard teńgeden asa somany quraǵan.

2014 jylǵy 31 jeltoqsandaǵy esep boıynsha, «Nur Otan» partıasyna 849 myń 674 adam múshe bolsa, partıanyń jastar qanaty - «Jas Otan» qatarynda 164 myń 115 adam bar dep kórsetilgen.

Nurzat Toǵjan