Búgin Almaty qalasy Naýryzbaı aýdanynyń Qalqaman-2 yqshamaýdanynda hımıa-bıologıa baǵytynda oqytatyn Nazarbaev Zıatkerlik mektebi ashyldy. Bul - kólemi jaǵynan elimiz boıynsha eń úlken mektep bolyp tabylady. Bul týraly «Qamshy» portaly QazAqparatqa silteme jasaı otyryp habarlaıdy.

Saltanatty ashylý rásimine Almaty qalasynyń jańa ákimi Baýyrjan Baıbek, belgili ǵalymdar, saıasat jáne qoǵam qaıratkerleri, pedagogter, oqýshylar jáne ata-analar qatysty.

«Qazaqta «El bolam deseń, besigińdi túze» degen jaqsy sóz bar. Sondyqtan da Elbasy Nursultan Nazarbaev táýelsizdiktiń  alǵashqy jyldarynan bastap, bilim salasyna úlken mán berdi. «Bolashaq» baǵdarlamasyn qurdy. Sol baǵdarlama búginde óz jemisin berýde. Sondyqtan, Elbasymyz sekildi eshteńeden qoryqpaý kerek. Adamnyń qolynan kóp nárse keledi. Eń bastysy, shyn nıet, ynta-yqylas, bilim jáne jiger qajet. Esterińizde bolsyn, bilim - bul jaqsy. Biraq, tárbıesiz ol nátıje bermeıdi. Iaǵnı, Otanyn shyn súıgen patrıotty, mádenıetti, tárbıeli jáne bilimdi azamat bolyńyzdar. Elbasynyń saıasatyn ári qaraı jalǵastyratyn sizdersizder», - dedi óz sózinde Almaty qalasynyń ákimi Baýyrjan Baıbek.

Aıta ketelik, respýblıkamyzda Nazarbaev Zıatkerlik mektepteriniń ashylýy Elbasynyń bastamasymen «20 Zıatkerlik mektep» atty memlekettik baǵdarlama aıasynda júzege asyrylyp keledi. Alǵashqy fızıka-matematıka baǵytyndaǵy Nazarbaev Zıatkerlik mektebi 2009 jyly Astana qalasynda ashylǵan bolatyn. Qazirgi tańda elimizde 18 mektep jumys isteıdi.

Nurzat Toǵjan