Keshe Sholpan-Atadaǵy «Rýh Ordo» saraıynda ótken Qazaqstan men Qyrǵyzstan memleketteriniń arasyndaǵy kedendik-shekarany ashý saltanatynda qyrǵyz prezıdenti Almazbek Atambaev myrza el ekonomıkasy týraly sóz ete otyryp, Qazaqstanǵa degen yqylasyn bildirgen. Bul týraly qyrǵyzstandyq «Vechernyı Bıshkek» basylymy jazǵan, dep habarlaıdy «Qamshy» portaly.
Memlekettik shekarany ashý saltanatynda Almazbek Atambaev myrza óziniń qazaqstandyq áriptesi Nursultan Ábishuly týraly aqjarma tilegin bylaısha bildirgen eken.
«Qyrǵyzstanda Nursultan Nazarbaevtaı Prezıdent bolǵan emes, sondyqtan da biz damý jaǵynan artta qalyp kelemiz. Qazaqstandaǵy JİÓ-niń jan basyna shaqqandaǵy mólsheri bizdegiden 15-20 ese joǵary. Jyl qorytyndysy boıynsha, Qazaqstan JİÓ –mólsheri jóninen TMD elderi arasynda birinshi orynǵa shyǵady», -deıdi Atambaev myrza.
Sondaı-aq, ol halyqaralyq jıyndarda Qazaqstan Prezıdentiniń janynda turatynyn maqtan kóretindigin de jasyrmaǵan.
«Ol tek Orta Azıada ǵana emes búkil álemdegi ozyq memlekettiń kóshbasshysy. Eki el arasyndaǵy shekarany ashý – bul tarıhı oqıǵa. Meniń endi bir ǵana armanym bar – ol keleshekte eki el arasynda eshqandaı kóldeneń kedergiler bolmasa eken. Sebebi, biz baýyrlas memlekettermiz»,-degen Almazbek Atambaev myrza saltanatty jıynda.
Sonymen qatar, Atambaev myrza qyrǵyzdar men qazaqtar búkil túrki jurtynda bir-birine eń jaqyn baýyrlar. Bir qýanyshtysy osyndaı baýyrlarymyz barda Qyrǵyzstannyń isi órge domalaıtyn bolady. Qudaı soǵan jetkizsin. Biz jarqyn bolashaqqa baǵyt aldyq. Endigi jerde eki el arasynda eshqandaı kedergiler bolmasa eken,-deı kele tipti, Ystyq kóldiń aýa –raıy birneshe kúnnen beri qubylyp turǵan edi. Sizdiń kelýińizben Ystyq kóldiń ózi jarqyrap, ysyp sala berdi ǵoı,-dedi qyrǵyz Prezıdenti.
Óz kezeginde Nursultan Ábishuly Qazaqstannyń 1,5 mlrd dollar ınvestısıa salǵandyǵyn aıta kelip, eki el arasynda shekarany ashqanymyzdyń jetistigin kóreıik,-dedi. «Sizderdiń úlken aǵalaryńyz retinde men árqashan sizderge kómek beretin bolamyn»,-dedi QR Prezıdenti Nursultan Nazarbaev.
Nurzat Toǵjan
