Shymkenttegi Chapaev eldimekeninde sońǵy eki kúnde eki ret jarylys boldy. Quqyq qorǵaýshylar jarylystar saldarynan eki turǵynnyń aıaǵyn birinshi dárejeli kúıik shalǵanyn aıtady. Bul týraly «Qamshy» portaly Azattyqqa silteme jasaı otyryp habarlaıdy.

Tamyzdyń 12-si jáne 13-i kúnderi Shymkent qalasyna qarasty Chapaev eldimekeninde eki ret jarylys boldy. Bul oqıǵalardyń kesirinen alǵashqy kúni - 11 jasar oqýshy qyz, ekinshi kúni 39 jastaǵy azamattyń aıaǵyn kúıik shalǵan.

Alǵashqy jarylys  tamyzdyń 12-si kúni bolǵan. Oqıǵa kýágeri, jarylystan zardap shekken Farıdaniń qurbysynyń aıtýynsha, túski saǵat 12:30-dar shamasynda dúkenge ketip bara jatyp, abaısyzda jarylǵysh zatty basyp ketken. Osydan keıin  aıaǵyn kúıik shalǵan Farıdanyń anasy bul oqıǵa týraly qandaı da bir pikir aıtýdan bas tartqan. . Al olardyń kórshileriniń sózinshe, jarylys bolǵan sátte «qatty dybys shyqqan». Jarylys bolǵan Prıvolnaıa kóshesiniń turǵyny Vera Nıkolaeva «qatty dybysty estigende gaz balony jaryldy dep oılaǵan».  

Al tamyzdyń 13-i kúni saǵat kúndizgi 11:30-dar shamasynda Chapaev eldi-mekenindegi Krjıjanovskıı atyndaǵy kóshede taǵy jarylys bolǵan. Ol joly 39 jastaǵy ekinshi toptaǵy múgedek azamat zardap shekken.

Ońtústik Qazaqstan oblystyq ishki ister departamentiniń (İİD) baspasóz hatshysy Saltanat Qarakózova Shymkenttegi Chapaev eldimekeninde sońǵy eki kúnde qatarynan eki jarylystyń bolǵanyn rastaǵan.

Tamyzdyń 12-si kúni oqıǵa ornyna (Chapaev eldimekeni – red.) barǵan polısıa qyzmetkerleriniń anyqtaǵany - 11 jasar oqýshy qyz kórshi úı janynan ótip bara jatyp, pakettegi qoldan jasalǵan jarylǵysh zatty basyp ketken. Sol aıaǵynyń tabanyn birinshi dárejeli kúıik shaldy. Qazir úıinde emdelip jatyr. 13-i kúni de osyndaı oqıǵa bolyp, er adamnyń aıaǵyn birinshi dárejeli kúıik shaldy, ol da úıinde emdelip jatyr, - deıdi. 

Oblystyq (İİD) baspasóz ortalyǵy bergen málimet boıynsha, «Tamyzdyń 12-si kúngi oqıǵaǵa baılanysty Shymkent qalasy Eńbekshi aýdany polısıa bólimi qylmystyq kodekstiń «buzaqylyq» baby boıynsha is qozǵap, tergeý júrgizip jatyr. Chapaev eldimekeniniń bir turǵyny (er adam) kúdikti retinde ustalǵan. Ekinshi jaıtqa qatysty izdestirý jumystary bastalǵan. Eki jarylystyń bir-birine baılanysy joq».

Al tamyzdyń 13-i kúni bolǵan jarylystan zardap shekken azamattyń ákesi Saıdýlla Salıbekov «sońǵy úsh jylda Chapaev eldi-mekeninde túsiniksiz jaǵdaıda birneshe ret osyndaı jarylystar bolǵanyn» aıtty.

2012-2013 jyldary Shymkenttiń Chapaevka eldi mekeninde bolǵan birneshe jarylystar saldarynan bir adam aýyr jaralanyp, eki adam ortasha dárejede jaraqattanǵan edi. Jergilikti quqyq organdary sol jarylystarǵa qatysy bar degen kúdikpen ustaǵan úsh adamnyń isin qaraǵan sot byltyr kóktemde olardy aıypty dep tanyp, ekeýin 14 jylǵa jáne bireýin 13 jyl merzimge bas bostandyǵynan aıyryp, jazalaryn qatań rejımdegi kolonıada óteýge jáne dúnıe-múlikterin tárkileýge úkim shyǵarǵan.

Nurzat Toǵjan