Sońǵy eki aptanyń ishinde qazaq bıliginde aıtarlyqtaı jańalyqtar oryn aldy. Eń aldymen Almaty qalasyn uzaq basqarǵan A. Esimovtiń Astana jaqqa aýysyp, ornyna  «Nur Otan» partıa tóraǵasynyń birinshi orynbasary Baýyrjan Baıbektiń taǵaıyndalýy áleýmet arasynda jaqsy talqylandy. Talqy barysynda «Jas kelse, iske» degen fraza jıi aıtyldy. Al búgin Shymkent qalasyna   Ǵabıdýlla Ábdirahymov ákim etip taǵaıyndaldy. Taǵaıyndalǵan eki ákim de «Bolashaq» baǵdarlamasymen Germanıada  bilim alǵan. Ekeýin de prezıdent ózi daıyndaǵan kadr dep aıtýǵa tolyq negiz bar. Demek bılik óziniń býyndy kadryn osy ýaqyttqa deıin daıyndap, endi saıası sahnaǵa shyǵara bastady degen sóz. Aıtalyq, Ábdirahymov  Qazaqstan Respýblıkasy Prezıdenti Ákimshiligi Basshysynyń orynbasary,  Premer-Mınıstr Keńsesiniń Basshysy  qyzmetterin atqarǵan. Demek , ol- negizgi saıası júıe asqanasynyń qazany qalaı qaınaıtynyn kórgen kadr. Almaty qalasynyń jańa ákimi taǵaıyndalǵan tusta da «Qamshy» portaly B. Baıbektiń Almaty qalasynyń ákimtaǵyna deıingi jolyn saraptap usynǵan bolatyn. Ańǵarǵanymyzdaı «Bolashaq» baǵdarlamasynyń alǵashqy qarlyǵashtary el nazaryna ilige bastady. Syrttan bilim men tájirıbe jınaqtap kelgen jastarǵa halyqtyń senim artqysy keledi. Jastar demekshi, «Otyzda orda buzbaǵan, qyryqta qamal almaıdy» dep esepteıtin qazaq úshin saıasattaǵy qyryq jas- tym jas kórinetinin baıqadyq. Shyndyǵynda, alyp shaharlardyń tizginin qolǵa ustaý  úshin-«Eýropa baryp» bilim alyp, saıası júıeniń qazanynda qaınaýǵa ýaqyt ketedi. Bastysy bılikke jańa lek jáne jańa lep kelip jatyr. Kimderden qalmaǵan ákimtaq deısiz? Qazaqtyń qyrýar qarjysyn qymqyryp Hrapýnov otyryp ketken ákimtaq bolatyn. Ol kezde qazaq óz saıası kadryn daıarlaýdy jańadan ǵana qolǵa alyp jatsa kerek-ti. Sol daıyn bolǵan balalar endi-endi tóbe kórsetip jatyr. Ot janǵan jerde kúl qalady.(ásirese Almaty qalasynyń ımıji sońǵy jyldary otqa ábden ornaǵan edi) Ol kúldi qaıta tazalap, ornyn kókalǵa aınaldyryp abyroı jınaýdyń ózi ońaı sharýa emes.

Osy tusta kókeıde kóleńkelep jatqan taǵy bir suraq qylań beredi. Almatydan bastalyp, Shymkentpen jalǵasyn tapqan ákimtaq ıesin aýystyrý basqa qalalarda da oryn ala ma? Nege ózge óńirlerde ákimder men onyń orynbasarlary jemqorlyq faktisimen taqtaryn tastaýǵa «májbúr»? Bolashaqta prezıdenttikke úmitkerlerge arnalǵan talaptyń ishinde; ««Bolashaq» baǵdarlamasynyń túlegi bolýy tıis»,- dep kórsetilýi múmkin be?

Aınur Tóleý