Shymkent qalasyna jańa taǵaıyndalǵan ákim Ǵabıbolla Ábdirahymuly qalaǵa kelgen qonaqtardy «ketpeımin» dep jylaıtyndaı etemiz dedi. Bul týraly «Qamshy» portaly NUR.kz-ke silteme jasaıdy.

Jıynda sóz alǵan Shymkenttiń jańa ákimi ońtústik halqyna qyzmet etý úlken mártebe men jaýapkershilik ekenin atap ótken.

 «Eń aldymen týǵan qalama osyndaı laýazymdy qyzmetke jibergeni úshin prezıdent Nursultan Nazarbaevqa úlken alǵysymdy bildirgim keledi», – dep atap ótti ákim.

Sonymen qatar, jańa ákim Shymkent qalasy prezıdenttiń erekshe nazarynda ekenin, qalany damytýǵa tapsyrmalar bergenin atap ótti.

«Shymkent qalasyn tek Qazaqstandaǵy emes, álemdegi eń bir ádemi, qolaıly, kúndiz-túni qalada adamdar qydyryp júretin, Shymkentke keletin adamdar qaıtyp ketkisi kelmeıtindeı qala qylýymyz kerek. Qala qonaqtary «qala degen osyndaı bolýy kerek» dep aıtýy tıis. Jylap, qoshtasarda «ketpeımin» dep aıtatyndaı etý qajet», – deıdi jańa ákim.

Esterińizge sala keteıik, keshe Shymkent qalasynyń ákimdiginde ótken jıynda qalanyń jańa ákimi bolyp Ǵabıdolla Ábdirahymov taǵaıyndaldy. Jańa ákimdi prezıdent Nursultan Nazarbaevtyń ózi usynǵan. Bul usynysty qalalyq máslıhattyń depýtattary biraýyzdan qoldap, qýattaǵan bolatyn.

Nurzat Toǵjan