Búgin ǵana Qazaqstan Prezıdenti Nursultan Nazarbaev qarjylyq qıyndyqtyń Qazaqstandy qos búıirden qysqaly turǵandyǵyn aıtyp, ekonomıkalyq daǵdarystyń kele jatqandyǵyn eskertken edi.

Sondaı-aq, QR Úkimet basshysy Kárim Másimovtiń qatysýymen ótken úkimettiń selektorlyq otyrysynda da  Premer myrza ulttyq banktiń dollar baǵamyn ustap tura almaıtynyn aıtyp, teńge baǵamyn erkine jiberetinin málimdegende taǵy da teńge devalvasıasynyń bolatynyn,  daǵdarystyń halyqtyń qaltasyna salmaq salatynyn ańǵartsa kerek-ti.

Mınıstr myrza málimdeme jasaǵany sol-aq eken, Qazaqstannyń barlyq oblystaryndaǵy valúta aıyrbastaý oryndarynda dollar baǵasy sharyqtap ketti.

Sońǵy aqparattar boıynsha, qazirgi ýaqytta dollardyń bir teńgege shaqqandaǵy baǵamy – 256-ti kórsetti.

Bizdegi qalyptasqan júıe boıynsha, kez kelgen sheshim, zańnamalyq qujattar – Másimov myrza maquldamasa quny kók tıyn ekeni túsinikti. Qazirdiń ózinde áleýmettik jeliler men qazaqstandyq buqaralyq aqparat quraldarynda Kelimbetovti kelemejge aınaldyra bastaǵan. Biraq, dollar baǵasynyń sharqtaýyna – valútalyq dálizdiń alynyp tastalýy sebep bolǵanyn eskersek, soqqyny Másimov myrza jeýi tıis edi. Alaıda, bizdegi ornyqqan saıası «oıynshyqtardyń» buǵan eti úırenip qalǵany jasyryn emes te shyǵar.

 Endeshe, Premer myrzanyń aıtqanyndaı, Ulttyq bank óz salmaǵyn joǵaltyp, endi teńge baǵymyn ustap tura almaıtyn bolsa, Kelimbetovtyń kózine kók shybyn úımeleıtin ýaqyt ta alys emes dep topshylaýymyzǵa ábden bolatyn sekildi.

«Óńir ákimderi shtabtarǵa basshylyq jasap, jergilikti búdjetten qarjylandyrylatyn ataýly áleýmettik jáne turǵyn úı kómekteriniń deńgeıin arttyrý arqyly halyqtyń áleýmettik az qamtylǵan tobyna qoldaý sharalaryn qabyldaýy tıis. Sonymen qatar baǵanyń, ásirese, áleýmettik mańyzy bar azyq-túlikter men qyzmetterge negizsiz ósimine jol bermeý boıynsha uıymdastyrýshylyq sharalaryn qabyldaýdy tapsyramyn», – dep, jedel sharalardy jalpy úılestirýdi óziniń birinshi orynbasary Baqytjan Saǵyntaevqa, al áleýmettik máselelerdi orynbasary Berdibek Saparbaevqa júktegen edi Másimov myrza. Sirá, birdeńeni sezse kerek-ti.

Bul jolǵy teńgeniń qúnsyzdanýy men dollar baǵasynyń kúrt sharyqtaýy – birinshi kezekte qarapaıym halyqtyń qaltasyna salmaq salatyny belgili. Ásirese, ıpotekaǵa jáne nesıege turǵyn úıler men múlik alǵandar 40 paıyzdyq ústeme aqy tóleýge tıisti májbúrli bolatyny anyq.

Bas bankırdiń dollar baǵasy 190 teńgeden  aspaıdy dep sendirgeni men ol halyqtyń seniminen shyqqaly qashan?! Al senimnen shyqqan úkimetke halyq razy bolmasy anyq. Tek «halyq kóterilip ketpese ıgi» dep seneıik.

Qazaqstandyq ekonomıserdiń boljamdaryna súıensek, aldaǵy ýaqytta dollar baǵamy turaqsyzdanady. İle-shala azyq-túlik baǵasy sharyqtap shyǵa keledi.

Joǵarydaǵy jaıttardy eskere kele, bir emes, birneshe márte halyqty aldap soqqan alaıaqtar jazasyz qalmaýy tıis dep topshylaýymyzǵa ábden bolatyn sekildi.

Sondyqtan, QR Úkimet basshysy K.Másimov pen QR Ulttyq banktiń tóraǵasy Qaırat Kelimbetovter otstavkaǵa ketýi tıis! Qajet bolsa bar qazaqtyń taǵdyryn qolyna ustaǵan aqsaqal bıliktiń de taqtan taıatyn kúni alys emes sıaqty...

Nurgeldi Ábdiǵanıuly