Bilim jáne ǵylym mınıstrliginiń qarjylyq qyzmetin tekserý máselesine qatysty suraqtarǵa bilim jáne ǵylym vıse-mınıstri Sholpan Karınova ortalyq komýnıkasıalar qyzmeti brıfıńinde jaýap berdi.

– Dúnıejúzilik bankiniń zaımyna, qaryzǵa baılanysty áleýmettik jelilerde kóterilgen másele  boıynsha túsinik berip ketkendi jón kóremin. Qaryzdy alý 2014 jyly bastalǵan bolatyn. Osy jyly sheshim bekitilip, 2018 jyly barlyq depýtattar iske asyrylýyn qoldaǵan bolatyn. 2018 jyly tıisti búdjettik usynymdar boıynsha, búdjettik josparlaý jumystaryna baılanysty halyqaralyq qaryz bolǵandyqtan, onyń resmı jumysyn júrgizý boıynsha ister atqaryldy. Qaryzǵa baılanysty óziniń bekitilgen jospary bar. Osy josparǵa saı tıisti jumystar júrgizilip kele jatyr.

Búgingi kúni depýtattar kóterip jatqan másele – "Nelikten osy qaryz kóleminde josparlanǵan kompúterler tehnıkasy satyp alynbady?". Osy boıynsha tereńirek toqtalyp óteıin. Jalpy bul kompúterlerdi satyp alý máselesi 2021 jylǵa josparlanǵan bolatyn. Tıisti qarajattardy 2021 jylǵa qaraı qarastyrylǵan. Bunyń negizgi maqsaty – osy qaryzdyń sheńberinde aldyńǵy kontenttik jumystardy josparlap, aıaqtaý. Onyń ishinde, bilimniń sapasyn jaqsartý, oqýlyqtarǵa, ınklúzıvti bilim berýge, jalpy pedagogıkalyq bilimdi jańartý máselelerine baılanysty birqatar jobalardy iske asyrý bolatyn. Osy kontent jaǵyn rettegennen keıin baryp qana tıisti tehnıkalyq quraldardy alýdy josparlaǵan bolatynbyz, – dedi vıse-mınıstr.

Vıse-mınıstr kompúterlerdi satyp alý jumystarynyń qolǵa alynǵanyn atap ótti.

– Al endi bıyl pandemıa eshkimge aıtyp kelgen joq. Osy másele tóńireginde tez satyp alý jumystaryn da mınıstrlik qolǵa alyp bastap kórdi. Osy naýryz aıynda dúnıejúzilik bankke habarlasyp, tez, jyldam  satyp alý jumystaryn sheshý máselesin qoıǵan bolatynbyz. Bul úkimettiń tarapy jaǵynan birqatar qosymsha qarajattardy qajet etedi. 

2021 jylǵa josparlaǵan qarajattardy respýblıkalyq búdjetti naqtylaý kezinde jyljytyp, 2020 jylǵa ákelý suraqtaryn da qarastyrý uzaqqa sozylatyn is. Halyqaralyq rásimder boıynsha, bul proses 9-dan 12 aıǵa deıin ýaqyt alady. Sondyqtan osy qaryz kóleminde kompúterlerdi satyp alý jumysy boıynsha qashyqtan uıymdastyrýǵa qatysty úlgeremiz deıtin bolsaq, naýryz aıynda satyp alýdy bastaımyz. Kelesi jyly naýryz aıynda konkýrstyq prosedýralar bolady. Sodan keıin ǵana jetkiziledi. Osy jaǵdaı eskerilip, mınıstrlik kompúter tehnıkasyn satyp alý máselesine baılanysty qaryzdy toqtatý sheshimin qabyldady. Odan basqa búdjetten tıisti qarajatty bólý, jergilikti búdjetten, respýblıkalyq búdjette mektepterdi kompútermen qamtamasyz etý jumystary bastaldy, – dedi vıse-mınıstr, – dedi ol brıfıńte.

Eske sala keteıik, keshe parlament májilisiniń jalpy otyrysynda depýtat Jámıla Nurmanbetova mektep oqýshylarynyń qashyqtyqtan bilim alýyna ashýlanyp, oqý jylyna sapasyz daıyndalǵany úshin sheneýnikterdi jaýapkershilikke tartýdy suraǵan.

"Qarjy qaıda ketti?". Depýtat bilim mınıstrine suraq joldady