Elimizde Halyqaralyq eńbek uıymynyń jobalyq keńsesi jumysyn bastady. Bul týraly QR Eńbek jáne halyqty áleýmettik qorǵaý mınıstri Svetlana Jaqypova aıtty.

Úkimet otyrysynda Eńbek jáne halyqty áleýmettik qorǵaý mınıstri Svetlana Jaqypova elimizde eńbek qaýipsizdigi salasyndaǵy mamandardy daıarlaýǵa baǵyttalǵan oqý ortalyǵy ashylatynyn habarlady.

Onyń aıtýynsha, ótken jyly Qazaqstanǵa alǵash ret Halyqaralyq Eńbek Uıymynyń (HEU) Bas dırektory resmı saparmen kelgen. Osy sapardyń nátıjesinde bıyl elimizde HEU-nyń jobalyq keńsesi ashylyp, jumysyn bastady.

— Qazirgi tańda biz Eńbek resýrstaryn damytý ortalyǵy bazasynda Halyqaralyq eńbek uıymynyń Týrındegi oqý ortalyǵynyń fılıalyn ashý baǵytynda belsendi jumys júrgizip jatyrmyz, — dedi mınıstr.

Jańa ortalyq kelesi mańyzdy mindetterdi atqarýǵa múmkindik beredi:

• Shetelge shyqpaı-aq eńbek qaýipsizdigi mamandaryn sapaly ári júıeli túrde daıarlaý;

• Halyqaralyq úzdik tájirıbe negizinde ulttyq kadrlardyń biliktiligin arttyrý;

• Memlekettik organdar, áleýmettik áriptester men halyqaralyq uıymdar arasyndaǵy yntymaqtastyqty nyǵaıtý;

• Qazaqstannyń Ortalyq Azıadaǵy eńbek qaýipsizdigi salasyndaǵy aımaqtyq quzyrettilik ortalyǵy retindegi rólin kúsheıtý.

Bul bastama eldegi eńbek qaýipsizdigin jaqsartýǵa jáne halyqaralyq standarttarǵa saı kadrlar daıyndaýǵa serpin beredi.