Sherzat Bolat isi boıynsha sottalǵandardyń merziminen buryn shartty bosaýy týraly suraqqa jábirlenýshi taraptyń quqyǵyn qorǵaǵan advokat Meıirman Shekeev jaýap berdi. 

Aıtýynsha, Qylmystyq kodekste asa aýyr bap boıynsha merziminen buryn shartty bosaý ózgeshe qarastyrylǵan.

Olar (sottalýshylar – red.) ondaı ótinishhatpen (sotqa – red.) júginýi múmkin. Olar merziminiń jartysyn óteýi qajet. Sebebi bul – asa aýyr qylmys. Sonymen qatar azamattyq talapty qanaǵattandyrýlary tıis. Qarjaýbaı (marqum Sherzat Bolattyń ákesi – red.) "Maǵan aqsha qajet emes, olar tolyqtaı jazasyn ótep shyqqany kerek" dedi. Biz azamattyq talapty birdeı tártippen óndirip alý týraly ótinish bildirdik. Iaǵnı bir taraptyń aqshasy bolyp, moraldyq ótemaqyny qanaǵattandyrǵanymen ekinshi taraptyń ondaı múmkindigi bolmasa, olar shyǵa almaıdy, - dep túsindirdi advokat.

Sondaı-aq aıyptalýshylar jábirlenýshi taraptan ruqsat suraýy qajet.

Aýyr qylmys bolǵandyqtan olar jábirlenýshi taraptan (merziminen buryn shartty túrde bosap shyǵý úshin – red.) ruqsat suraýlary kerek. Sońǵy sheshimdi sot qabyldaıdy. Materıaldardy zerttep, bárin qaraıdy, - dedi Meıirman Shekeev.