"Qazaqstan Halyq partıasynyń" ókili Ǵazız Qulahmetov soqyr tıyn paıda ákelmegen ulttyq kompanıalardy túbimen qurtyp, áleýmettik saqtandyrý qoryn taratý kerek dep sanaıdy.

– Qoǵamnyń qozǵaýshy kúshi – halyq. Oǵan osy kúni búkil pármendi shıkizat sektorynan aýyl sharýashylyǵynyń damý prosesterine, ǵylymnyń qaıta jandanýyna, ózge de óndiris salalaryn jetildirýge jumsaǵanymyz jón bolady. Jalpy kvazımemlekettik sektorǵa tolyq revızıa jasalý kerek. Soqyr tıyn paıda ákelmegen ulttyq kompanıalardy túbimen qurtý kerek. Odan da ol aqshany ózekti máselege jumsaıyq.  Áleýmettik saqtandyrý qoryn da taratý kerek. Olarǵa bólinetin aqshany pandemıamen kúresken mamandarǵa, medısına salasyna jumsaýymyz kerek. Kópshilikke syry ashyla qoımaǵan salalarǵa jastardy jumyldyrý kerek. Soǵan qaraı beıimdeý kerek, – dedi ol. 

Ǵ.Qulahmetov aýyldy jerlerdegi ınternet máselesin de kóterdi. Onyń aıtýynsha, ınternetti qazaqtyń ár aýylyna jetkizetin mezgil keldi. Órkenıetke bir qadam bolsa da jaqyndaýymyz kerek. 

– Sondyqtan, Qazaqstan mindetti túrde modernızasıaǵa qaraı bet burǵany jón. Tarıhı-mádenı qundylyqtarymyzǵa, rýhanıatymyzǵa eshbir saıası ózgerister qaýip tóndirmeýi kerek. Erteńniń qaıyry – búgingi kúnde. Sony umytpaıyq. Sondyqtan da biz halyqpen birgemiz dep aıtqym keledi, – dedi Qulahmetov.