Sheshenstan Respýblıkasynyń basshysy Ramzan Qadyrov musylman memleketteriniń basshylaryna, sonyń ishinde Qazaqstan, Túrkimenstan, Ózbekstan, Ázirbaıjan jáne Tájikstan Respýblıkalarynyń Prezıdentterine úndeý joldaǵan.
Ol óziniń áleýmettik jelidegi pararqashsynda bosqyn musylmandarǵa qamqorlyq kórsetip, Batystyń qatygez saıasatyna qarsy turýǵa shaqyrǵan. Bul týraly «Qamshy» portaly tengrinews.kz-ke silteme jasaı otyryp habarlaıdy.
Sheshen basshysynyń musylman memleketteri kóshbasshylaryna joldaǵan úndeýiniń qazaq tiline aýdarylǵan nusqasyn «Qamshy» portaly nazarlaryńyzǵa usynady.
Ramzan Qadyrov, Sheshenstan lıderi:
«Assalamaǵalaıkým! Jıyrma birinshi ǵasyr! AQSH pen Batys elderi bıik minberlerden álemdegi demokratıa, adam quqyqtaryn qorǵaý jaıly aıtyp, dúnıede adam ómirinen asqan baılyq joq deıdi de, ózderi mıllıondaǵan beıbit turǵyndardyń tragedıalyq óliminiń sebepshisi bolyp otyr. Mysaly, Aýǵanstan, Irak, Sırıa, Palestına, Lıvıa, Iemen, Aljır, Sýdan, Somalı jáne basqa da musylman memleketterin ashyq qyryp-joıýda. Bul elderdi AQSH pen Batys qıratty, ekonomıkasyn kúıretti, ishki janjaldar týdyrdy, beıbit turǵyndardy bosqyn bolýǵa májbúrledi. Búginde sol elderdegi soǵys pen ashtyqtan myńdaǵan bosqyn Eýropaǵa qashýda. Biraq, olar Jerorta teńizine batyp jatyr, júk kóliginde tunshyǵyp jatyr. Teńiz olardyń qabirine aınalýda. BUU Bas hatshysy Pan Gı Mýn men eýropa elderi basshylary bul jaıǵa alańdaýshylyq bildirýde ekendikterin jetkizgen. Qazirgi tańda soǵys jolymen máseleni sheshý múmkin emes. Al, Eýropanyń aınalysyp jatqany da osy. Allanyń elshisi (s.a.ý.) «musylmandar bir-birlerine kómektessin» dep aıtqan. Búgin myńdaǵan musylman, qarıalar, áıelder, balalar ólip jatyr. Al musylman memleketteriniń osy jaǵdaıda qol qýsyryp qarap otyrýǵa haqylary joq. Únsiz qalmaýymyz kerek. Mahsharda osynyń suraýy aýyr bolady. Men qolymnan kelgen kómegimdi aıamaımyn. Men musylman retinde bárimiz bir Allanyń quly ekenimizdi eskertemin. Biz álsizderge qorǵan bolyp, muqtajdarǵa kómek qolyn sozýymyz kerek.
Sondyqtan da, Túrkıa, Saýd Arabıa, BAÁ, Katar, Oman, Bahreın, Kýveıt, Ioardanıa, Indonezıa, Malaızıa, Qazaqstan, Túrkimenstan, Ózbekstan, Ázirbaıjan, Tájikstan Respýblıkalarynyń basshylaryn dinimizdegi baýyrlarymyzdy qorǵaýǵa shaqyramyn. Eger Batystyń qatygez saıasatyna búgin qarsy turmasaq, erteń osy memleketterdiń kez kelgenine qaýip tóneri sózsiz. Káne, búginnen bastap bir sheshim qabyldaıyq! Biz myńdaǵan adamdy ólimnen qutqaryp qala alamyz! Erteń kesh bolýy múmkin. Allahý Akbar!!!».
Nurzat Toǵjan
