Keshe «Soıýz TMA-18M» ǵarysh kemesi Astana ýaqytymen saǵat 13:39-da Halyqaralyq ǵarysh beketine jetip, keme ekıpajy osy bekette jumys istep jatqan alty ǵaryshkermen júzdesti. Bul týraly «Qamshy» portaly 24.kz-ke arnasyna silteme jasaı otyryp habarlaıdy.
Qazaqstandyq ǵaryshker Aıdyn Aıymbetovtyń ǵaryshtaǵy ǵylymı zertteýleri Qazaq ǵylymynyń damýyna úles qospaq. Qazaq ǵaryshkeri ǵylymnyń tórt salasy boıynsha jumys isteıtin bolady.
Ǵaryshker fızıkalyq jerdi ǵaryshtan zertteý medısınalyq jáne bıologıalyq ǵylymdar boıynsha tájirıbeler júrgizedi.
“Halyqaralyq ǵarysh beketinde tuńǵysh ret 9 ǵaryshkerden jasaqtalǵan halyqaralyq ekıpaj jumys isteıtin bolady”, – dedi baspasóz konferensıasynda reseılik ǵaryshkerler baǵdarlamasynyń jetekshisi Vladımır Solovev.
Sondaı-aq, ǵarysh kemesiniń Halyqaralyq ǵarysh beketine jetýine eki táýlik ýaqyttyń jumsalǵanyna baılanysty qazaqstandyq ǵaryshker Aıdyn Aıymbetovtyń jáne danıalyq astronavt Andreas Mogensennyń ǵaryshtaǵy sapary eki táýlikke qysqaryp segiz táýlikti quramaq.
Alaıda mundaı qysqartý qazaq ǵaryshkeriniń ǵylymı jobasyn tolyq júzege asyrýǵa kedergi keltirmeıtin bolady.
Ǵaryshtaǵy saparyn sátti jalǵastyryp jatqan Aıdyn Aıymbetov ǵaryshtan Qazaq halqyna jáne Jer planetasynyń turǵyndaryna sálem joldady.
“Berilgen tapsyrmany ýaqytynda oryndaımyn dep sendiremin. Ózimdi jaqsy sezinýdemin, beıimdelý jaqsy ótti. Jerlesterim men qazaqstandyqtarǵa salamaleıkým”, – dedi Qazaq ǵaryshkeri Aıdyn Aıymbetov.
