Qazaqstanda halyqqa qyzmet kórsetý ortalyqtary bazasynda «Azamattar úshin úkimet» memlekettik korporasıasy qurylatyn boldy. Bul týraly «Qamshy» portaly «Qazaqstan» arnasyna silteme jasaı otyryp habarlaıdy.

 «HQKO-lar ótinimder qabyldaý jáne nátıjelerin berýdi ǵana júzege asyra otyryp, tek front-keńse qyzmetterin kórsetýde. Áleýmettik qorǵaý, jer qatynastary, jyljymaıtyn múlikti rásimdeý qyzmetterin kórsetetin basty RMK-lardy qosý arqyly «Azamattar úshin úkimet» memlekettik korporasıasyn qurý tek qana ótinimderdi qabyldap qana qoımaı, sonymen birge olardy óńdeý jumystaryn da oryndaýǵa múmkindik beredi. Halyqqa qyzmet kórsetý ortalyqtary jumysynyń oń tájirıbesin eskere otyryp, biryńǵaı provaıderdi «Jer kadastrynyń ǵylymı-óndiristik ortalyǵy» RMK,  «Jyljymaıtyn múlik ortalyǵy», RMK jáne «Zeınetaqy tóleý jónindegi memlekettik ortalyq» RMK-ni qosyý arqyly HQKO-lar bazasynda qurý usynylady», — dedi Sársenov zań jobasyn tanystyra otyryp.

Qazaqstan azamattary memlekettik qyzmetterdi bir jerden alatyn bolady.

Onyń atap ótýinshe, zań jobasy «Azamattar úshin úkimet» memlekettik korporasıasy uǵymyn zań júzinde bekitýdi, sondaı-aq «Jer kadastrynyń ǵylymı-óndiristik ortalyǵy» RMK,  «Jyljymaıtyn múlik ortalyǵy», RMK jáne «Zeınetaqy tóleý jónindegi memlekettik ortalyq» RMK kórsetken memlekettik qyzmetterdi memlekettik korporasıanyń  kórsetýin, memlekettik qyzmetter kórsetý rásimderin jetildirýdi, memlekettik kórsetiletin qyzmetterdi ońtaılandyrýdy kózdeıdi.

«Qazaqstan azamattary memlekettik qyzmetterdi bir jerden alatyn bolady. Zań jobasy halyqaralyq tájirıbe, onyń ishinde Kanada tájirıbesi negizinde ázirlendi. Canada Service biryńǵaı provaıderi memlekettik qyzmetterdiń tolyq sıklin kórsetý qaǵıdaty boıynsha jumys isteıdi, ıaǵnı qujattardy qabyldaý, óńdeý jáne berýdi uıymnyń ózi júzege asyrady», — dep qorytyndylady vıse-mınıstr.