Jaqynda qazaqstandyq buqaralyq aqparat quraldarynda úsh birdeı oblys ákiminiń saýnadaǵy «seriligi» týraly aqparat tarady. Jáı serilik emes, ózderiniń qyzmettik mansabyn paıdalana otyryp, oblystyq teatr trýppasy men fılormonıa ártisterin saýnada án saldyryp qoıǵan-mys. Bul aqparat áýelde matritca.kz saıtynda jarıalanǵanmen, arada kóp uzamaı jatyp-aq, maqala alynyp tastalǵan.
Al matritca.kz-ke silteme jasaǵan tribunakz.com saıty 29 tamyz kúni Aqmola, Qostanaı jáne SQO ákimderi – Sergeı Kýlagın, Nuraly Sadýaqasov jáne Erik Sultanovtardyń Aqmola oblysyna qarasty Zerendi aýylynda demalys úıindegi saýnada kóńil kótergenderin jáne oblystyq teatr trýppasyn túgel jáne fılormonıadan ártister shaqyrǵandyǵy týraly jazǵan. Saıt aqparattaryna súıensek, 50 shaqyrym qashyqtyq joldy júrip kelgen teatr trýppasy áýelde tyr jalańash ákimderdiń kóńilin kótetetindikterin bilmegen. Uzyn-yrǵasynda, mansapshyl ákimderdiń monshadaǵy shoýy 1 saǵatqa jalǵasqan. Aıtpaqshy, Zerendide zerigip jatqan ákimderdiń kóńilderin kótergeni úshin úsh ákimniń bireýi de ónerpazdarǵa alǵys aıtpaǵan, qalamaqylaryn bermegen-mys.
Bul týraly matritca.kz-ke habarlasqan Kókshetaý qalalyq Sh.Qusaınova atyndaǵy qazaq dramma teatry ártisiniń (aty-jóni kórsetilmegen) aǵasy Dáýlet Qýanyshpaev aıtyp bergen.
«Meniń qaryndasym Qusaınova atyndaǵy teatrda jumys isteıdi. Eki-úsh kún boldy, qatty sharshap júr. Kóńil-kúıi de joq. Búkil teatr trýppasyn Zerendidegi «Zeren» demalys úıine aparyp, Aqmola, Qostanaı jáne Petropavlosk (SQO) oblystarynyń ákimderiniń aldynda óner kórsetýge májbúrlegen. Buny maǵan qaryndasym keıin aıtyp berdi. Ákim myrzalardyń ózderi saýnada tyr jalańash otyryp, teatr ártisterine án aıtqyzyp qoıǵany qaı basynǵandyǵy? »,-deıdi Dáýlet Qýanyshpaev.
Onyń aıtýynsha, teatrlandyrylǵan kórinis bir saǵatqa sozylǵan. Bul úshin ónerpazdarǵa eshkim qosymsha aqy tólemegen.
«Bul 29 tamyz kúni bolǵan. Ol jerge quramynda 15 adam bar teatr trýppasy men oblystyq fılarmonıa ártisteri barǵan. Ártister is-sapar eken dep, tańǵy saǵat 07:00-de jolǵa shyqqan. Negizgi júriletin qashyqtyq 55 shaqyrym bolǵanymen, ónerpazdar tún jarymda biraq úıge oralǵan. Al ákim myrzalardyń patsha kóńilderi ónerpazdardyń óner tamashalaýy úshin tún jarymdy kúttirgen»,-deıdi ártistiń aǵasy.
Teatr ártisteri saýnadaǵy sheneýnikterdiń shekten shyqqan áreketteri týraly quzyrly organdarǵa málimdeýge bel býǵanymen, óz qyzmetterinen aıyrylyp qalýdan qorqatyny da ras ekendikterin jasyrmaıdy.
Joǵarydaǵy málimetterdi saraptaı kele túıgen túıinimiz - saýnadaǵy «sheneýnikter shoýy» ákim myrzalardyń ánsheıingi erkeligi me, álde teatr ártisteri atqarýǵa tıis qalypty jumys normasy ma?..
Esterińizde bolsa, oıyn-saýyqty jany súıetin Pavlodar oblysynyń «erkeligin» Aqorda keshirmep edi ǵoı. Qylmystyq is qozǵap, qýdalaýǵa túsken ákim sonda da kinásin moıyndaýdan bas tartqan. Iá, bir kisi taqqa minse, qyryq kisi atqa minedi degendi osy joly ákim myrzalar júz paıyzǵa dáleldep bergendeı boldy. Úsh oblystyń ákimderi demaladyny estigen qolshoqparlar, jandaıshaptar ártisterdi ábden ábigerge salǵany túsinikti boldy... Sergeı Kýlagın men onyń qurmetti qonaqtarynyń osy bir áreketteri beıne bir soıys maly men saýyn bıelerin, ánshi-bıshileri men nókerlerin ertip júretin baǵzy zamannyń baılarynan kem túspese kerek-ti. Álde memlekettik tilden góri resmı tildiń mysy basym oblystar úshin ákim myrzalarǵa aıryqsha erik berilgen be? Qalaı bolǵan kúnde de, máselemen quzyrly organdar aınalysyp, tergeý jumystary júrgizilýi tıis edi. Alaıda bizdegi qalyptasqan júıe boıynsha «komanda músheleri» bir-birlerin satpaǵan... Al «komandalyq» júıemen jumys júrgizetin saýyqshyl ákimderdiń tizgin ustap turǵan dáýreninde qarapaıym ártister men ánshi-bıshilerdiń kóretin kúnderi osy da. «Aqsaqal bıliktiń» kishi sheneýnikteri kimge arqa súıep, osyndaı áreketke barýy múmkin? Bul erkelik emes – kúsh kórsetý. Ónerdi qorlaý, ónerpazdardy mazaqqa aınaldyrý emes pe? Mádenıetti monshada qorlaǵan ákimder tıisti jazalaryn alýy tıis!
Tabanynyń búri joq ákimderden ne úmit, ne qaıyr?!
Nurgeldi Ábdiǵanıuly
