Al Qydyráli Bolmanov «Astana» arnasy tilshisine bergen suhbatynda, qazylar alqasy durys iriktelmegen dep málimdeme jasady. Onyń aıtýynsha, qazylar quramynda bul salanyń barlyq janryn túsinetin jan az bolǵan. Osynyń saldarynan keı ánshiler tym tómen baǵa aldy, deıdi.
Qydyráli Bolmanov, prodúser, «Turkvizyon» án baıqaýynyń qazylar alqasynyń múshesi:
- 24 adam qazylar alqasynda otyrǵan, olardyń kóbisi mamandar emes. Olar shoý-bıznesti ıgermegen adamdar. Shoý-bıznestiń tunyp turǵan tehnologıasyn nazaryna ala qoımaıtyn adamdar dep esepteımin. Birinshiden, óte asyǵys ýaqytta boldy. Óte tyǵyz ýaqytta. Degenmen, eń bastysy boldy. Eń bastysy bastaldy.
Eske salamyz, túrki áleminiń basyn qosqan shara Túrkıanyń Eskıshehır qalasynda ótti. Baıqaýda ázirbaıjandyq ánshi Farıd Gasanov jeńimpaz atandy. Al Qazaqstan atynan barǵan «Rıngo» toby oılamaǵan jerden toǵyzynshy orynǵa túsip qaldy. Án men ánshilerdi baǵalaý boıynsha osy toptyń prodúseri Alýa Qonarovanyń da aıtary barǵa uqsaıdy. Qonarova Tvıtterdegi shaǵyn blogynda «Bul qazylar alqasynyń sheshimi. Tolyǵyraq, elge kelgen soń bolatyn baspasóz máslıhatynda estısizder» dep jazdy. Soǵan qaraǵanda «Turkvizyon 2013» aıaqtalǵanymen, daýy bastaý alatyn túri bar.
Pikir qaldyrý