Parlament senaty ishki ister qyzmetiniń máseleleri týraly zańdy qabyldady. Bul týraly İshki ister mınıstri Erlan Turǵymbaev málimdedi.

– Prezıdent ýchaskelik ınspektorlardyń mártebesin kóterýdi tapsyrdy. Birinshi ýchaskelik ınspektorlardyń quzyreti keńeıedi jáne ýchaskelik ınspektordyń kómekshisi laýazymy engiziledi. Ekinshi daktıloskopıalyq tirkeý ýaqytyn 2023 jyldyń 1 qańtaryna deıin sozý qarastyrylǵan. Úshinshi, tótenshe jaǵdaı mınıstrliginiń qurylýyna baılanysty birqatar ókilettik basqa memlekettik organdarǵa beriledi. Azamattyq qorǵaý bólinisterine tergeý júrgizý quzyreti beriledi. Al órt sóndirý qyzmeti óz aldyna jańa statýspen quqyq qorǵaý organdarynyń ishine kiredi, – dedi Turǵymbaev.

Mınıstr aýdandyq bólimshelerge 2 myńǵa jýyq ýchaskelik ınspektor kómekshisin engizý qajettigin atap ótti.

– Olar nege qalada emes, aýyldarda bolady desek. Negizinen bizde patrúldik polısıa, kóbine qalalarda. Iaǵnı bir qylmys oryn alsa, birinshi bolyp patrúldik polısıa jetedi, keıin ýchaskelik ınspektor barady. Al aýyldarda kerisinshe, alǵash kómekke ýchaskelik ınspektor barady, sebebi eldi mekenderde odan basqa eshkim joq. Ýchaskelik ınspektordyń kómekshileri kámeletke tolmaǵandardyń isimen de aınalysady. Sebebi jergilikti jerlerde balalardyń isin qaraıtyn tek bir ǵana ınspektor bar, – dep atap ótti senat otyrysynda mınıstr.

Sonymen qatar ýchaskelik ınspektorlardyń mártebesin kóterý úshin 3 jyl ishinde olardyń jalaqysyn ósirý josparlanyp otyrǵanyn jáne baspana máselesimen qamtý qarastyrylyp jatqanyn aıtty.