"Áleýmettik jelide jarıalanǵan Kenesary hannyń bas súıegi týraly aqparat ǵalamtordy dúr silkindirdi" deıdi 31 arna tilshileri .

Kenesary - aq kıizge kóterilgen qazaqtyń eń sońǵy hany. Túrkıaǵa barǵan saparynda Nursultan Nazarbaev "qazaqtyń eń sońǵy hany óltirilgen soń, elimizde otarlaý saıasaty kúsheıgenin" aıtqan edi.

Sensasıalyq sýret áleýmettik jelilerge keshe tańerteń salynǵan. Biraq bul sýretti kimniń qaıdan alǵany belgisiz. Belgilisi, bas súıek telefonnyń kamerasyna túsirilgen. Jabyq  áınektiń ishinde saqtaýly turǵan  qanqanyń astyndaǵy belgi qaǵazda "Kenesary han Qasymov, poslednıı razboınık kırgızkoı stepı" degen jazý bar.

Bas arnaıy temir qondyrǵyǵa qoıylǵan. Aldyńǵy tisteri túgel saý.  Anyqtap qarasańyz qasynda taǵy bir bas súıektiń sheti kórinedi. Iaǵnı, murajaıdyń ishi bolýy múmkin. Al, qanqanyń joǵary jaǵy temirmen jıektep qaptalǵanynan, bas súıekti kúlsalǵysh retinde qoldanǵan dep topshalaýǵa bolady.

Kenesary urpaqtaryn zertteýshi ǵalym Rashıd Orazovtyń aıtýynsha, orys patshaıymy Ekatarına Kenesarynyń bas súıegine altyn quıdyryp, kúlsalǵysh jasatqan degen boljamdar buǵan deıinde aıtylǵan.

Biraq,  babamyzdyń basy murajaıda bulaısha ashyqtan-ashyq saqtalyp turýy múmkin emes deıdi. 

Óıtkeni, 1994 jyldan beri saılanǵan ekspedısıalardyń eshbiri nátıje bermegen. Kenesarynyń bas súıegi bolýy múmkin mekemeler men muraǵattarǵa deıin aqtaryp shyqqan izdeýshilerimizdiń barlyǵynyń taýy shaǵylǵan bolatyn.

Rashıd Orazovtyń aıtýynsha, jaqynda premer- mınıstr Serik Ahmetovte sońǵy hannyń basyn qaıtarýdy  shegelep aıtyp,  izdestirýshilerge  taǵy da tapsyrma  beripti. Alaıda, ǵalymdarymyz, Han Keneniń basyn qaıtarýdan buryn, ol bas súıekti izdeýdiń ózi az ǵana adamdardyń qolynan kelmeıdi deıdi. 

Sebebi, bir ǵana Ermıtajdyń ózinde 3,5 mln eksponat bar. Al, zertteýshi ǵalym Hankeldi Ábjanov bolsa, qansha saılanyp shyqqan ekspedısıa taba almaı qoıǵan bul dúnıeni rasymen tapqan adam bolsa, baıaǵyda súıinshi surar edi. Bul arandatýshylyq áreket dep esepteıdi.

Eger ol tabyla qalsa, eger onyń bári aqıqat bolsa, ol nemenege jasyrynyp otyr buryn jarıalaǵan adam.

"Eger ol tabyla qalsa, eger onyń bári aqıqat bolsa, ol nemenege jasyrynyp otyr buryn jarıalaǵan adam. Qaıta búkil qazaqtan súıinshi surap, óziniń bet álpetin aıtyp, aty jónin aıtyp, júrer edi ǵoı", - deıdi Shoqan Ýálıhanov atyndaǵy tarıh jáne etnologıa ınstıtýtynyń dırektory Hankeldi Ábjanov.

Aqyry, jarıalanǵan sýrettiń túpnusqasyn tabý úshin, 31 arna tilshileri áleýmettik jelige jarıalaǵan jigittermen habarlasty. Olar belgili bir aktrısa jarıalady degen ýáj aıtty.

"Aktrısa" jarıalaǵan foto bolǵan soń, tilshiler tezirek ol túsip jatqan fılmniń rejıserine habarlasty. Al, túbinde biz izdegen Han keneniń bas súıegi Máskeýden de emes, Sankt-Peterbordyń  Ermıtajynan da emes, Asfendıarov atyndaǵy qazaq ulttyq medısına ýnıversıtetiniń murajaıynan tabyldy. 

Ǵalamtorǵa jarıalanǵan sensasıalyq sýrettiń túpnusqasy Almatydaǵy Asfendıarov atyndaǵy medısına ýnıversıtetiniń murajaıynan tabylǵany tipti sensasıa boldy. Alaıda, bul biz oılaǵandaı qazaq dep qasyq qany tamǵansha qyrqysqan  Kenesary Qasymulynyń bas súıegi bolmaı shyqty. 

Bul rejıser Satybaldy Narymbetov Kenesary týraly "Amanat" fılmine arnaıy jasalǵan dekorasıa eken. Bul týraly rejıserdiń ózi aıtyp berdi.