"Óz tańdaýymdy baıaǵyda jasadym". Janbolat Mamaıdyń abaqtydan jazǵan haty jarıalandy

/image/2022/05/13/crop-15_37_706x1255_280286231_5051782984874992_3807728877169165282_n.jpg

Úsh aıǵa jýyq ýaqyttan beri qamaýda otyrǵan qoǵam belsendisi, Demokratıalyq partıa bastamashyl tobynyń jetekshisi Janbolat Mamaı abaqtydan hat jazdy. Hatty belsendiniń jubaıy, jýrnalıs Inga Imanbaı facebook paraqshasynda jarıalady. Quqyqqorǵaýshylar saıası kózqarasy úshin qamaýda otyr deıdin Janbolat Mamaı hatynyń mátini tómende usynylyp otyr. (Mátinde avtorlyq orfografıa jáne pýnktýasıa saqtalǵan).

Demalys kúnderi Almaty men Brússelde saıası tutqyndardyń bostandyǵyn talap etip, azamattardyń mıtıńige shyqqanyn estidim. Qazaqstanda bári báz-baıaǵydaı: cobr qorshaýy, ákimshilik qamaýlar men aıyppuldar. Dem partıanyń belsendilerin taǵy da qamady. Meniń jubaıym Inga Imanbaıdy sońǵy bir aptada osymen ekinshi ret ustap, aıyppul saldy. "Jańa Qazaqstan" emes, burynǵy tas júrek, repressıvti Nazarbaev júıesi ekeni kórinip tur. Sol buryńǵy qýdalaý, qamaý, aıyppul salý. Meni túrmege qamaǵany azdaı, endi otbasy múshelerime qol salypty. Bılikte otyrǵan jemqorlarǵa aıtarym: ózderińdi er azamatpyn dep qalaı aıtasyńdar osydan keıin? Tipti qandy qol mafıanyń ózi otbasyǵa tıispeý degen kodekspen ómir súredi. Al bul bılik qandy qorqaýdan esh aıyrmasy joq ekenin kórsetip otyr emes pe osylaısha?

Al Brússelde qazaq belsendileriniń mıtıńke shyǵyp, bizge qoldaý bildirgeni úlken jańalyq boldy men úshin. Osy istiń bas-qasynda júrgen aqıqatshyl jýrnalıs, saıası emıgrant Azamat Mamanovqa jáne onyń úzeńgiles serikterine alǵysym sheksiz. Eldegi jaǵdaıǵa júregi aýyratyn Eýropadaǵy barsha aǵaıynǵa rahmet aıtamyn. Aıtpaqshy, meni qamaýǵa ustaý merzimin 3-shi aıǵa sozdy. Qamaýda ustap, moraldyq turǵyda syndyrý úshin. Biraq bul bıliktiń qolynan kelmeıdi. Nazarbaev rejımi muny jasaı alǵan joq. Endi onyń bıliginiń shıbórileri muny jasaı alamyn dep armandamasyn.

Qańtar bılikke esh sabaq bolmaǵany qazirden ańǵarylady. Qarýmen, kúshpen halyqty basyp otyra almaısyńdar! Saıası reformanyń ornyna saıası tehnologıalardy paıdalanyp, 19 mln halyqty aldaý da qoldaryńnan kelmeıdi. Bul bos áýreshilik. Naqty saıası reformalarsyz, halyqty áleýmettik qoldaýsyz bul rejımniń bolashaǵy bolmaıdy. Reformany jyldarǵa sozyp, birtindep jasaımyn deýde ótirik áńgime. Reformalar jyldam, naqty, toqtaýsyz júzege assa ǵana bir ózgeris bolady.

Al qazirgi qamaýlarǵa, qýdalaýlarǵa qaraǵanda, barlyǵy tek sóz júzinde qalyp otyrǵany anyq baıqalady. Bir meniń ǵana isimdi alyńyz. Eshqandaı qylmys joq, dálel joq. Tipti amnıstıaǵa ilinip turǵan bap. Biraq meni qamap otyr. Esh negizssiz. Jaı ǵana bıliktiń ozbyrlyǵymen. Zańsyz. Saıası sebeptermen. Ádiletti soty bar, obektıvti tergeý organdary jumys istıtin elde búl múmkin bolar ma edi? Joq árıne. Bılik túrmede uzaq ustasaq "kinásin" moıyndap, bosatýdy jalynyp suraıdy dep oılasa kerek. Biraq bul bolmaıdy. Óz tańdaýymdy baıaǵyda jasadym. Túrmege qamalý múmkin ekenin de túsindim. Soǵan qaramastan elde qaldym. Eshqaıda qashpadym. Osyny ashyq aıta alamyn.

PS. Bostandyqtaǵy barsha aǵaıynǵa sálem aıtamyn. Kúresterińizdi toqtatpańyzdar. Ádildiktiń aq týy bizdiń qolymyzda!”

Janbolat Mamaı

13.05.2022 j

Janbolat Mamaı aqpan aıynan beri qamaýda otyr. Ol aldymen qańtar oqıǵasy qurbandaryna arnalǵan qaraly mıtıńti uıymdastyrǵany úshin 15 táýlikke, artynsha eki qylmystyq is boıynsha eki aıǵa qamaýǵa alynǵan. Oǵan "qarabet" degeni úshin quqyqqorǵaý organy qyzmetkerin qorlady, nesıe amnıstıasyna baılanysty "jalǵan aqparat" taratty degen aıyp taǵylyp otyr. Atalǵan aıyptarǵa sáıkes, sot kináli dep tapsa, belsendi 3 jylǵa bas bostandyǵynan aıyrylýy múmkin. Janbolat Mamaıdyń jaqtastary men adam quqyǵy salasyndaǵy bedeldi halyqaralyq Human Rights Watch jáne Amnesty International uıymdary belsendini qýdalaýdyń saıası astary bar ekenin aıtady.

"Óz tańdaýymdy baıaǵyda jasadym". Janbolat Mamaıdyń abaqtydan jazǵan haty jarıalandy

Qatysty tegter :

Pikir qaldyrý

Qatysty Maqalalar