Reseılik RBK basylymy eks-prezıdent Nursultan Nazarbaev úshin Elbasy statýsynan aıyrylý neni bildiredi degen saýalǵa jaýap izdep, birqatar sarapshyny sózge tartqan.
E.M. Prımakov atyndaǵy álemdik ekonomıka men halyqaralyq qatynastar boıynsha Reseı ulttyq zertteý ınstıtýtynyń aǵa ǵylymı qyzmetkeri Stanıslav Prıchın "qazirgi prezıdent bılikten burynǵy elıtany alastatýǵa tyrysyp jatyr, Elbasy týraly zańnyń kúshin joıý Toqaev pen Nazarbaev toby arasyndaǵy astyrtyn teketiresti kórsetedi" degen pikirde.
Sarapshy Nazarbaevtyń úlken saıasatqa oralý múmkindigi joǵyn, onyń endigi mindeti klanynyń múddesin qamtamasyz etý ekenin aıtady.
Prıchın Nazarbaev 2020 jylǵy qańtarǵa deıingi kezeńge qaraǵanda jetekshi oıynshy emes, biraq saıası, ekonomıkalyq alańda iri fıgýra dep sanaıdy.
Ortalyq Azıa boıynsha ekspert Arkadıı Dýbnovtyń pikirinshe, Nazarbaev táýelsiz Qazaqstan sımvoldarynyń biri retinde qalýǵa tyrysady, ári solaı bolady da. Biraq ol táýelsiz Qazaqstannyń negizin qalaǵandardyń biri retinde atalǵanymen, Qytaıda Mao Szedýndy, Soltústik Koreıada Kım Ir Sendi ulyqtaǵandaı, ony ulyqtaý ańǵarylmaıdy.
Arkadıı Dýbnov sondaı-aq Nazarbaevty ózine berilgen artyqshylyqtan birtindep aıyrý qańtardaǵy tártipsizdikter boıynsha sot prosesine ákeletin qadam bolyp shyǵýy ǵajap emes degen oıda.
Pikir qaldyrý