"Rosatom" memlekettik korporasıasynyń bas dırektory Alekseı Lıhachev Qazaqstandaǵy alǵashqy atom elektr stansıasyn (AES) salýǵa halyqaralyq konsorsıýmǵa jetekshilik etýge qatysty pikir bildirdi. Onyń aıtýynsha, joba aıasynda álemdegi eń zamanaýı AES-terdiń biri boı kótermek.

AES jobasynda jańa býyndaǵy VVER-1200 reaktorlary qoldanylmaq. Lıhachevtiń málimdeýinshe, bul – ýaqyt synynan ótken ınjenerlik sheshimder men halyqaralyq qaýipsizdik standarttaryna tolyq saı keletin, belsendi jáne pasıvti qorǵanys júıelerimen jabdyqtalǵan "3+" býyndaǵy reaktorlar.

"Mundaı reaktorlar qazirgi ýaqytta Reseımen qatar Belarýs, Vengrıa, Mysyr, Túrkıa, Bangladesh jáne Qytaıda da sátti paıdalanylyp jatyr", – dedi ol.

Lıhachev jobany júzege asyrý barysynda ozyq tehnologıalar men halyqaralyq tájirıbe qoldanylatynyn atap ótti. Onyń aıtýynsha, "Rosatom" Qazaqstannyń erekshelikterin eskere otyryp, túrli elderdiń jetkizýshilerimen tyǵyz jumys isteýdi josparlap otyr.

"Alda úlken jumys kútip tur. Biz bul iske Reseı men Qazaqstan bıliginiń qoldaýyna senim artamyz", – delingen "Rosatom" taratqan resmı málimdemede.

Eske sala keteıik, buǵan deıin Qazaqstannyń Atomdyq energıa agenttigi alǵashqy AES jobasy boıynsha halyqaralyq konsorsıýmǵa "Rosatom" jetekshilik etetinin habarlaǵan bolatyn. Agenttik basshysy Almasadam Sátqalıev bolashaqta taǵy bir atom stansıasyn salý josparda baryn aıtyp, ol jobadaǵy negizgi seriktes retinde Qytaıdyń memlekettik CNNC korporasıasy tańdalatynyn jetkizgen.

Sátqalıevtiń aıtýynsha, AES qurylysy aıaqtalǵan soń, Qazaqstan onyń tolyqqandy ıesi bolady. Jobadaǵy seriktestik formýlasy: "Keldi, saldy, úıretti – ketti" qaǵıdasyna negizdelgen.