Premer-mınıstrdiń birinshi orynbasary Roman Sklár “Qytaı – Ortalyq Azıa” ındýstrıalyq-ınvestısıalyq yntymaqtastyq forýmynda sóılegen sózinde Ortalyq Azıa óńiriniń aýyl sharýashylyǵy jáne strategıalyq metaldar salasyndaǵy zor áleýetine toqtaldy.

Sklárdyń aıtýynsha, Ortalyq Azıa — qurǵaq egistik aýyl sharýashylyǵyn damytýǵa qolaıly klımattyq jaǵdaılarǵa ıe álemdegi biregeı óńirlerdiń biri. Bul aımaq bıdaı, maıly daqyldar, sondaı-aq et pen sút ónimderin óndirýde joǵary básekege qabilettilikke ıe.

"Aýyl sharýashylyǵyn damytýda negizgi basymdyq — jańa tehnologıalardy engizý, ónimdilikti arttyrý jáne ónimdi tereń óńdeý. Qazaqstan aldaǵy on jylda dándi daqyldardy tereń óńdeý boıynsha álemniń úzdik on eliniń qataryna kirýdi josparlap otyr", – dedi ol.

Sonymen qatar, ol Qazaqstan men Qytaı arasynda organıkalyq aýyl sharýashylyǵy ónimderin Qytaı naryǵyna jetkizý baǵytynda eleýli ósý áleýeti bar ekenin atap ótti. Bul úshin eki el arasyndaǵy shekteýlerdi tolyq alyp tastaý qajet.

Forýmda Sklár sırek kezdesetin jáne strategıalyq metaldar salasyndaǵy uzaq merzimdi áriptestikti damytýdyń mańyzdylyǵyna da nazar aýdardy.

"Bul metaldarǵa álemdik suranys jyldan-jylǵa artyp keledi. Olar búginde 'ekinshi munaı' retinde baǵalanady. Qazaqstanda 5 myńǵa jýyq zerttelmegen paıdaly qazbalar ken orny bar. Biz nıkel qorytpalary men akýmýlátorlyq materıaldar óndirisin eki negizgi baǵyt retinde aıqyndadyq", – dedi ol.

Sklár bul salada Qazaqstan "ınvestısıalar men tehnologıalar – shıkizatqa" degen pragmatıkalyq formýlaǵa súıenip, qytaılyq kompanıalarmen naqty jobalardy iske asyrýǵa daıyn ekenin jetkizdi.

Sóz sońynda ol Qazaqstanda Qytaıdyń qatysýymen 50 myń jańa jumys orny ashylǵanyn, aldaǵy ýaqytta eki el arasyndaǵy ınvestısıalyq yntymaqtastyq jańa deńgeıge kóteriletinin eske saldy.