Qazaqstandaǵy ekinshi atom elektr stansıasynyń (AES) qurylysyn salý jónindegi konsorsıýmnyń jetekshisi retinde Qytaıdyń CNNC (China National Nuclear Corporation) kompanıasy tańdaldy. Bul týraly Atom energıasy jónindegi agenttik tóraǵasy Almasadam Sátqalıev málimdedi.

Onyń aıtýynsha, aldyn ala irikteýge qatysqan barlyq úmitkerlerdiń ózine tán biregeı tehnologıalary bolǵanymen, eń tartymdy usynystar Qytaı men Reseı kompanıalarynan túsken.

 «Qytaımen ıadrolyq saladaǵy yntymaqtastyq týraly jeke kelisimge qol qoıý josparlanyp otyr. Biz taǵy bir AES salý úshin Qytaı tehnologıalaryn Qazaqstanda kórgimiz keledi. Obektıvti túrde aıtsaq, álemde ıadrolyq otyn sıklin tolyq ıgere alatyn elder kóp emes. Qytaı – sondaı memleketterdiń biri. Bizdiń kelesi basty basymdyǵymyz – Qytaımen yntymaqtastyq», – dedi Sátqalıev.

Agenttik basshysy sondaı-aq Qytaı tarapymen joǵary deńgeıde kelissózder júrgizilip jatqanyn, qazaqstandyq tarap Qytaıdyń jyldam ári sapaly qurylys júrgizý tájirıbesin paıdalanýǵa múddeli ekenin aıtty.

«Biz bul baǵytta jumysty bastap kettik. Agenttik tıimdi konsorsıýmdar qurýy tıis», – dedi ol.

Aıta keteıik, buǵan deıin elimizde salynyp jatqan birinshi AES qurylysyn reseılik “Rosatom” kompanıasy júzege asyratyny habarlanǵan bolatyn.