«Qarasha, jeltoqsan men sol bir eki aı,
Qystyń basy, biri erte, bireýi jaı», - dep Abaı atam aıtqan qystyń basy bul kúnde jańa jyldyń basy bolyp ketken. Bizdiń bılik jańa jylǵa daıyndyqty jeltoqsanda bastasaq jaı bolady dep, qarasha aıynan bastap ketedi. Mine, jańa jyldyń daıyndyǵy bastalar qarasha aıy da keldi. Ákimdikter qudasy kele jatqandaı daıyndyǵyn kórip jatqan bolýy da múmkin.
Ókinikshke oraı, bizdiń qasıetimiz de qasiretimiz de bolǵan jeltoqsan aıy shyrshalardyń jarysmen ótip ketedi. Baǵasy men bıiktigi bir-birin artqa qaldyrǵysy keletin ár qalanyń shyrshasy óz aldyna jyr. Jeltoqsan aıy keshegi Alash Ordanyń qurylǵan, búgingi táýelsizdiktiń jarıalanǵan, 86 jylǵy bozdaqtardyń qany aǵylǵan aı edi ǵoı. Al, qazir ony eske alýdyń ornyna shyrsha ornatyp, qulatyp, órtep, qaıta oryna qoıyp áýremiz. Bizdiń elde buǵan deıin eń bıik shyrsha 30 metirden asyp, ony bezendirýge jumsalǵan qarajat 38 mıllıon teńgege deıin barǵan edi. Osynsha el qarjysyna qoıǵan shyrshalardyń jelge qulap jyǵylyp, órtenip ketkenin aıtpaǵannyń ózinde, bir aıdan keıin qoqysqa tastalatynyn eskersek, daǵdarys jan alqymnan alǵanda jańa jyldyq shyrshamen jarysý ne teńimiz? Ekonomıkalyq shyǵyndaryn aıtbaǵan kúnniń ózinde, bizdiń ultqa múlde jat dúnıeni engizip, jas urpaqqa atadan kele jatqan dástúrdeı kórsetkende ne utamyz?
Esterińizde bolsa, Osydan 3 jyl buryn Ońtústik Qazaqstan oblysynda sol kezdegi ákimi Asqar myrzamhmetov myrza táýelsizdik kúnine deıin jańa jylǵa daıyndyq kórýge tıim salyp, búkil qazaqtyń mereıine bólengen edi. Myrzahmetov myrzanyń bul ıgi bastamasyn jalǵastyrǵan jalǵyz ákim – Qaraǵandy oblysynyń burynǵy ákimi Baýyrjan Ábdeshov 2013 jyly Qaraǵandy oblysynda táýelsizdik kúnin atap ótpeıinshe jańa jylǵa daıyndyqqa tıym salatynyn aıtqan edi. Baýyrjan ákimniń buırǵy tek bir jylǵa jarady, bir jyldan keıin táýelsizdikti ulyqtamaq turmaq, óz basy isti bolyp shyǵa keldi. Al, qazir ońtústikte 3 jyldan beri táýelsizdik kúninen buryn jańa jyldyń daıyndyǵyn jasamaǵan ákim «Nur Otan» parıasy tóraǵasynyń birinshi orynbasary.
Daǵdarys etekten tartyp turǵandyqtan, Elbasynyń ózi búkil qazaqstandyqtarǵa únemshil bolýdy aıtqan edi. Ulttyq qundylyqtardy bárinen joǵary qoıatyn «Nur Otan» tóraǵasynyń birinshi orynbasary únemshildikti ońtústiktegi ıgi isin odan ary kemeldendirý jolynan bastap, ákimdikterden bastap búkil memlekettik mekemelerdi jańa jyldyq shyrshadan bas tartýǵa shaqyrýy kerek. Shyrshanyń bezendiretin zattarynyń bári shetelden keletindikten daǵdarys kezine onyńda baǵasy ósip, siz ben bizdiń qaltamyzdy bekerge qaǵatynyn eskersek, atamyz kórmegen shyrshaǵa qosh aıtysatyn ýaqytymyz keldi. Bastysy shyrsha úshin el bújetinen bir tıyn shyǵyndalmaýy kerek. Al, óz shyrshasyz jańa jyldy ótkize almaımyn deıtinder bolsa, óz qaltasynan shyrshasyn turǵyza bersin.
Joǵaryda aıtqandaı «Nur Otan» tóraǵasynyń birinshi orynbasary keshe bir oblysqa táýelsizdik kúnin toılamaıynsha, jańa jyldyń daıyndyq jumystaryn jasatpaǵan. Endi, bas parıanyń búkil Qazaqstanǵa táýsizdik kúni men Alash Orda kúnin atap ótpeıinshe jańa jylǵa daıyndyq jasatpaýǵa shamasy jetedi degen senimdemiz. Bul ǵana emes, shyrshamen qosh aıttyrsa Myrzamhmetov myrzanyń aty el tarıhynda altyn árippen jazylary anyq.
Turdybek Qurmethan
