Ulybrıtanıa saparynda Prezıdent Nursultan Nazarbaev brıtandyq kompanıa basshylarymen kezdesti. Bul týraly «Qamshy» portaly habarlaıdy.
Nursultan Ábishulymen alǵashqylardyń qatarynda kezdesý múmkindigine Shell kompanıasynyń atqarýshy dırektory Ben van Berden ıe boldy. Kezdesý barysynda energetıka jáne munaı hımıasy salalaryndaǵy yntymaqtastyqty budan ári damytýdyń perspektıvalary talqylandy.
Memleket basshysy kompanıa bizdiń elimizge kelgeli beri birqatar iri jobalardy júzege asyrǵanyn, sonyń arqasynda Qazaqstan ekonomıkasyndaǵy jetekshi ınvestorlardyń biri bolyp otyrǵanyn atap ótti.
B. van Berden óz sózinde bizdiń respýblıkamen yntymaqtastyq konsern jumysynyń basymdyǵy bar baǵyttarynyń biri ekenin aıtty. Ol sondaı-aq Nursultan Nazarbaevty Qazaq handyǵynyń 550 jyldyǵymen quttyqtady.
Sondaı-aq, Memleket basshysy «Arselor Mıttal» basshysy Lakshmı Mıttalmen de kezdesip, metalýrgıa salasyndaǵy áriptestik, shıkizat naryǵyndaǵy ózgerister jaıyn sóz etti. L. Mıttal Prezıdent N. Nazarbaevqa sheteldik ınvestorlardyń jumysyna laıyqty jaǵdaı týǵyzyp otyrǵany úshin alǵys bildirdi.
Elbasymen sonymen qatar, «J Rothschild Capital Management» kompanıasynyń basshysy Lord Djeıkob Rotshıldpen júzdesti. Investısıalyq áriptestik jaıy sóz bolǵan kezdesýde Nursultan Nazarbaev Astanada Halyqaralyq qarjy ortalyǵynyń qurylatynyn aıtyp, osy baǵyttaǵy áriptestik qarym-qatynastarǵa senim artatynyn jetkizdi. D. Rotshıld Qazaqstannyń Ortalyq Azıadaǵy qarjylyq hab mártebesin ıelenýdegi zor perspektıvalaryna toqtaldy.
Elbasymen kezdeskenderdiń biri «Rıo Tınto» kompanıasynyń bas dırektory Sem Ýolsh. Kezdesý barysynda taraptar geologıalyq barlaý salasyndaǵy jobalardy birlesip júzege asyrý máseleleri sóz boldy. Prezıdent N. Nazarbaev Qazaqstannyń tabıǵı resýrstarǵa baı el ekenin aıtyp, kompanıanyń elimizdegi jumysynan kóp jańalyqtar kútetinin jetkizdi. Ýolsh ta Qazaqstannyń «Rıo Tınto» kompanıasynyń zor qyzyǵýshylyǵyn týǵyzatynyn aıtty.
«Hıkma Farmasútıkals» kompanıasy dırektorlar keńesiniń tóraǵasy Saıd Darvazben kezdesý kezinde kompanıanyń qyzmeti qazaq memleketi úshin úlken mańyzǵa ıe ekendigin bildirdi. Kezdesýde farmasevtıka salasyndaǵy áriptestikti damytý jaıy sóz boldy. Darvazdyń pikirinshe, Qazaqstan – dári-dármek shyǵarý salasyn damytýda úlken áleýetke ıe el.
Prezıdent N. Nazarbaevtyń brıtandyq iskerlermen bolǵan kezdesýine sondaı-aq, «Royal Dutch Shell», «BG Group», «Barclays Bank», «Vitol Group», «De La Rue», «Glencore», taǵy basqa kompanıa basshylary qatysty.
Bilál Qýanysh
London
