Qazaqstan Respýblıkasynyń Prezıdenti Nursultan Nazarbaev Ulybrıtanıa Premer-mınıstrimen ótken kezdesýden soń jýrnalıserge arnap brıfıń ótkizdi, - dep habarlaıdy «Qamshy» portaly.

Brıfıń barysynda Elbasy Qazaqstan tarapyna sapar aıasynda aıryqsha joǵary qurmet kórsetilip otyrǵanyn aıtty. Nursultan Nazarbaev sondaı-aq, Birikken Koróldik ekijaqty qarym-qatynastar damýynyń osy kezeńinde Qazaqstanǵa 12 mıllıard dollar ınvestısıa salǵanyn, qazir elimizde brıtan kapıtalynyń qatysy bar 500 kompanıa jumys isteıtinin atap ótti.

Osy jańa ǵana Qazaqstan-Brıtanıa bıznes-forýmy aıaqtaldy. Keshke qaraı Brıtanıa bıznesiniń «kapıtandarymen» kezdesý ótedi. Bul bizdiń el úshin asa mańyzdy dep oılaımyn. İsker toptarymyz quny 5 mıllıard dollar bolatyn kelisimsharttar men memorandýmdar jasasty. Bul jobalardyń barlyǵy Qazaqstannyń shıkizattyq sektoryn damytýǵa ǵana baǵyttalyp otyrǵan joq, – dedi Qazaqstan Prezıdenti.

Memleket basshysy kelissózder barysynda kún tártibindegi halyqaralyq máseleler, sonyń ishinde Ýkraına men Taıaý Shyǵystaǵy ahýal qarastyrylǵanyn da atap ótti. 

Sonymen qatar, Memleket basshysy sapar barysynda qol qoıylǵan kelisimder mazmunyna toqtalyp, bul qujattardyń bolashaqtaǵy damýǵa baǵyttalǵanyn aıtty. Sonyń ishinde gaz, energetıka, munaı hımıasy jáne farmasevtıka salalaryndaǵy birlesken jobalar atap kórsetildi. Nursultan Nazarbaev Brıtanıa tarapymen Astana jáne London arasynda qosymsha áýe reısin ashý týraly kelisim jasalǵanyna da nazar aýdartty.

Bilál Qýanysh

London