Astanada Qazaqstan Respýblıkasynyń qorǵanys mınıstri Imanǵalı Tasmaǵambetov Ázirbaıjan qorǵanys vedomstvosynyń basshysy general-polkovnık Zakır Gasanovpen kezdesti. Bul týraly «Qamshy» portaly QR-y qorǵanys mınıstrliginiń baspasóz qyzmetine silteme jasap habarlaıdy.

Kezdesý barysynda qos mınıstr 2016 jylǵa arnalǵan áriptestik josparyn bekitti.

«Qazirgi tańda Ázirbaıjan men Qazaqstannyń teńiz flottary arasynda baılanys ornatýǵa asa zor mán berilýi kerek. Bul baǵytta Kaspııdegi tatý kórshilik pen qaýipsizdik máselesin nyǵaıtýda eki el basshylary deńgeıinde sheshilgen mańyzdy máseleler bar», - dedi óz sózinde Imanǵalı Tasmaǵambetov.

Ázirbaıjan Respýblıkasynyń qorǵanys mınıstri Zakır Gasanov Kaspıı akvatorıasynda birikken oqý-jattyǵýlar ótkizýdiń mańyzdylyǵyna toqtaldy. Imanǵalı Tasmaǵambetov áriptesin kelesi jyly Astanada ótetin «KADEKS-2016» áskerı qarý-jaraq pen tehnıkalardyń halyqaralyq kórmesine qatysýǵa shaqyrdy jáne Ulttyq qorǵanys ýnıversıtetinde áskerı kadrlar daıarlaýdy usyndy.

Vedomstvonyń baspasóz qyzmeti sondaı-aq, jaqyn ýaqytta eki el áskerıleri birikken jattyǵýlar ótkizýdi qolǵa alatynyn habarlady.