Ońtústik Qazaqstan oblysynda bes balabaqsha ashylyp, el ıgiligine berildi. Onyń biri Shymkent qalasyndaǵy №57 «Hadısha» balabaqshasy. «Balapan» baǵdarlamasy aıasynda ashylǵan 16 topqa negizdelgen mektepke deıingi mekeme 320 oryndyq. Balabaqsha qazirgi zaman talabyna saı barlyq bólmelermen jabdyqtalǵan, dep habarlaıdy Bnews.kz.
Munda oıyn bólmesi, asqana, mýzyka zaly, salaýatty ómir saltyn qalyptastyrýǵa arnalǵan sport zaly, ár topqa arnalǵan oıyn alańshalary qarastyrylǵan. Balalardyń densaýlyǵyn qadaǵalaıtyn medbıke bólmesi, psıholog, logoped jáne ustazdar bólmeleri bar. Atalǵan mekeme balalarǵa úsh tilde bilim beredi.
Sonymen qatar, kóne shahar Túrkistanda «Er tóstik» pen «Asyl bóbek» atty jańa eki balabaqsha ashyldy. 280 balaǵa laıyqtalǵan bul mekeme respýblıka búdjetinen salynyp otyr. Qos nysan qalanyń ulǵaıýyna baılanysty jańadan qonystanǵan turǵyndardy qajetti áleýmettik nysandarmen qamtý maqsatynda salynǵan. 2009 jyly búldirshinderdi balabaqshamen qamtý kórsetkishi nebary 13 paıyzdan aspaıtyn Túrkistanda sońǵy jyldary balabaqshalar sany artyp, búginde balǵyndardy mektepke deıingi mekememen qamtý 76,5 paıyzǵa jetip otyr.
Al Báıdibek aýdanyndaǵy Alǵabas aýyldyq okrýgine qarasty Shaqpaq jáne Qazata eldi mekenderinde eki balabaqsha baldyrǵandarǵa esigin aıqara ashty. Shaqpaq aýylynda ornalasqan «Aıgólek» balabaqshasynyń janynan 50 balaǵa arnalǵan 2 toptyń qosymsha jumys jasaýyna múmkindik beretin qosymsha ǵımarat paıdalanýǵa berildi. «Aıgólek» bóbekjaı balabaqshasynda mektep jasyna deıingi balǵyndarǵa múmkindiginshe bar jaǵdaı jasalǵan. Aýlasynda oıyn alańyna qajetti jabdyqtar ornatylǵan. Osy aýyldaǵy ekinshi qýanysh ol balabaqshaǵa japsarlas ornalasqan sırk úıirmesi.
Jalpy, Shaqpaq aýylynda sırk úıirmesi 1986 jyly ashylyp, túrli festıváldarǵa qatysyp, 1990 jyldardyń basynda júldeli oryndardan kórinip júrdi. Osy ǵımarattyń kúrdeli jóndeý jumysy «Jumyspen qamtý-2020» baǵdarlamasy aıasynda atqaryldy. Qazata aýylyndaǵy turǵyndardyń suraýy boıynsha orta mektep balabaqshaǵa yńǵaılastyrylyp, qaıta paıdalanýǵa berilip otyr. Qurylysy jergilikti búdjetten júrgizilgen «Jansaıa» bóbekjaıy 50 oryndyq. Munda mektep jasyna deıingi balǵyndarǵa múmkindiginshe bar jaǵdaı jasalǵan. Aýdanda mektep jasyna deıingi balalardy balabaqshamen qamtý keler jyly 82 paıyzǵa jetkizilmek.
Derekkóz: bnews.kz
