Qazaqstanda sheteldik valútada ıpotekalyq nesıe berýge tyıym salynady. Parlament Senatynyń bank aktıvteri men kredıtteri boıynsha keı zań aktilerine ózgerister men tolyqtyrýlar engizý týraly zań jobasyn talqylaǵan jalpy otyrysynda QR Ulttyq banki tóraǵasynyń orynbasary Qýat Qojahmetov málim etti, - dep habarlaıdy «Qamshy» portaly QazAqparatqa silteme jasap.
Aıta keterligi, jalpy otyrysta «Qazaqstan Respýblıkasynyń keıbir zańnamalyq aktilerine ekinshi deńgeıdegi bankterdiń jumys istemeıtin kredıtteri men aktıvteri, qarjylyq qyzmetter kórsetý jáne qarjy uıymdary men Qazaqstan Respýblıkasy Ulttyq bankiniń qyzmeti máselesi boıynsha ózgerister men tolyqtyrýlar engizý týraly» zań jobasy birinshi oqylymda talqylanǵan bolatyn.
Ulttyq bank tóraǵasy orynbasarynyń aıtýynsha, zań jobasynyń negizgi baǵyty boıynsha boryshtyq júktemeni tómendetý jáne banktik kórsetiletin qyzmetterdiń aıqyndylyǵyn arttyrý kózdeledi. Osy arqyly qaryz alatyn jeke tulǵalardyń quqyqtaryn qorǵaý tetikteri kúsheıtiledi. Bunymen qosa, qarjy júıesiniń turaqtylyǵyn qamtamasyz etý qarastyrylady. Úshinshiden, kapıtal naryqtaryn jáne ıslamdyq qarjylandyrýdy damytý normalary da qamtylyp otyr. «Tutynýshylar quqyqtaryn qorǵaý úshin valútalyq kirisi joq jeke tulǵalarǵa sheteldik valútada ıpotekalyq qaryzdar berýge tyıym salynady. Tólemder merzimi uzaq ýaqyt boıy ótip ketken kezde birinshi kezekte merzimi ótken negizgi boryshty jáne sońǵy kezekte turaqsyzdyq aıyby men aıyppuldardy óteý qarastyrylady. Sonymen qatar, ıpotekalyq turǵyn úı qaryzynyń sharty boıynsha mindetteme merzimi ótken soń 180 kúnnen keıingi syıaqy men turaqsyzdyq aıybynyń mindeti avtomatty túrde esepten shyǵarylady. Qaryz boıynsha mindettemeni buzǵan kezde joǵary turaqsyzdyq aıybyn, aıyppuldy jáne ósimpuldy esepteýdiń toqsan kúndik shekti merzimi belgilenedi», - dedi Q. Qojahmetov.
Iaǵnı, zań jobasynda qaryz tóleýge qabiletsiz alýshynyń mindettemelerine qatysty erekshe tártip qarastyrylyp otyr. Aıta keteıik, buryn qaryz tóleýge qabiletsiz tulǵa eń birinshi kezekte bankterdiń shyǵyndaryn ótep, sosyn ǵana negizgi qaryzyn tóleýi tıis edi. Bul tutynýshylarǵa qıyndyq týdyrǵan bolatyn. Al jańa zań jobasynda kerisinshe birinshi kezekte negizgi qaryzdy óteý qarastyrylady.
