Búgin Jambyl oblysy Qordaı aýdandyq sotynda bloger Ermek Taıshybekovtiń ústinen qozǵalǵan qylmystyq is boıynsha sot prosesi bastaldy. Bul týraly «Qamshy» portaly «Azattyqqa» silteme jasap habarlaıdy.

İs Almaty qalasynyń turǵyny Botagóz Isaevanyń aryzy boıynsha qozǵalǵan. Jambyl oblysy Qordaý aýdanynyń 37 jastaǵy turǵyny Ermek Taıshybekov Feısbýk áleýmettik jelisinde jarıalaǵan jazbalaryn aryzdanýshy ultaralyq arazdyqty týǵyzady dep sanaıdy.

Taıshybekovtiń ózi sotqa eki ótinish jasady. Biri – sot prosesine jýrnalıserdi qatystyrý, ekinshisi – bultartpaý sharasyn qamaq túrinen basqaǵa aýystyrý. Sýdıa jýrnalıserdiń proseske aýdıo-beıne jazý quraldarynsyz qatysýyna ruqsat berdi. Al, bultartpaý sharasyn ózgerissiz qaldyrdy.

Esterińizge salsaq, E. Taıshybekovtiń ústinen ultaralyq arazdyq týǵyzdy degen aıyppen ústimizdegi jyly 30 maýsymda qylmystyq is qozǵalǵan bolatyn. Mundaı áreketter úshin zańda eki jyldan jeti jylǵa deıin bas bostandyǵynan aıyrý jazasy qarastyrylǵan.

Alaıda, Ermek Taıshybekovtiń baýyry Erdos aǵasynyń áreketterinen eshbir qylmys quramyn kórmeıtinin, ol bar bolǵany óz oıymen bóliskenin, eshkimdi eshqandaı zańǵa qaıshy áreketke shaqyrmaǵanyn aıtady.