Búgin Elbasy Nursultan Nazarbaevtyń Parıjde isker qaýymdastyq ókilderimen kezdesýi ótti. Bul týraly «Qamshy» portaly habarlaıdy.
Kezdesýge búginde Eýropada «Fransıa ónerkásibiniń kapıtandary» atalyp ketken iri-iri 13 kompanıanyń basshylary qatysty. Olardyń ishinde Airbus, Alstom Transport, Vicat, Soufflet, Rothschild Group, Veolia Asia, Areva syndy álemge áıgili kompanıalardyń jetekshileri bar.
Elbasy kezdesýge qatysýshylarǵa Qazaqstan týraly tanytqan qyzyǵýshylyqtary úshin alǵysyn bildirdi.
«Eń aldymen barlyqtaryńyzǵa bizdiń respýblıkaǵa qyzyǵýshylyq bildirgenderińiz úshin alǵys aıtamyn. Sizderdiń aralaryńyzda Qazaqstanda qazirgi tańda jumys istep jatqan kompanıalar da jetkilikti jáne olar bizdiń eldiń uzaq merzimdi damý perspektıvalarymen jaqsy tanys», - dedi óz sózinde N. Nazarbaev. Qazaqstannyń tabıǵı resýrstarǵa baı memleket ekenin, álemdik daǵdarys saldarynan qosymsha ınvestısıalar tartý múmkindigi qarastyrylyp jatqanyn aıtqan Prezıdent fransýz kásipkerleri elge ınvestısıa quısa, olardyń aldynda jalpy halyq sany 170 mıllıonnan asatyn tutastaı Eýrazıalyq ekonomıkalyq odaqtyń naryǵy ashylatynyn jetkizdi. Qazaqstanda sheteldik ınvestorlardyń jumysyna múmkindikterdiń moldyǵy men memleket tarapynan jasalyp otyrǵan qolaıly jaǵdaıǵa nazar aýdartty.
Sonymen qatar, Elbasy sońǵy ýaqytta júzege asyp jatqan birikken jobalar týraly da sóz etti.
«Alstom» elektrovozdaryn shyǵarý, «Eýrokopter» tikushaqtary, «Pejo» men «Sıtroen» kólikterin qurastyrý, kún batareıasy, sement shyǵarý, «Danon» markaly sút ónimderi, taǵy basqa jobalar sátti júzege asýda», - degen Elbasy aldaǵy áriptestikke de úlken senim bildirdi.
Sonymen qatar, Prezıdent fransýz bıznesmenderin 2017 jyly Astanada ótetin EKSPO Halyqaralyq kórmesine shaqyrdy.
Aıta ketý, kerek Elbasy kezdesýge qatysqan 13 kompanıanyń basshylary tarapynan qoıylǵan suraqtar men ótinish-tilekterdiń barlyǵyna ózi jaýap berip otyrdy.
Dál qazirgi ýaqytta eki jaqty kelissózder barysynda jalpy quny 1,5 mıllıard AQSH dollary bolatyn kelisim-sharttarǵa qol qoıyldy.
Qazaqstanda Fransıanyń 24 kompanıasy quny 2 mıllıard dollardan asatyn 14 joba boıynsha jumys isteýde. Alda taǵy osyndaı 10 joba iske qosylady dep kútilýde. Eki el arasyndaǵy taýar aınalymy 6 mıllıard dollardan asady.
Elbasynyń Fransıaǵa el prezıdenti F. Ollandtyń shaqyrýymen ótip jatqan resmı sapary búgin bastalǵanyn esterińizge salamyz.
Bilál Qýanysh
Parıj
