Túsirilimi bastalmaı jatyp daqpyrty jer jarǵan áıgili «Qazaq eli» telehıkaıasy bıyl kórermenderge usynylmaıtyn boldy. Táýelsizdik kúni qarsańynda efırge shyǵady degen jobanyń áli aýy men baýy bar sıaqty. Respýblıkalyq aqparat quraldary ókilderin jınap, túsirilim jumystarymen tanystyramyz degen uıymdastyrýshylardyń ıgi nıetine qýanǵanyshymyz solardyń óz aýzynan osy jáıtterdi estigen soń sý sepkendeı basyldy.

Áý basta jıyrma serıaly fılm bolady delingen týyndy túrli sebeptermen on serıaǵa deıin qysqardy. Sáıkesinshe, senarı de aıtarlyqtaı ózgeriske túsip, túsirilim kesh bastaldy. Sonyń barlyǵy jınalyp kelip serıaldyń ekranǵa shyǵý ýaqytyn da keshiktirip otyr. Búginge deıin túsirý jumystarynyń tek 40 paıyzy aıaqtalǵan. Almaty oblysynyń Shoshanaı aýyly mańynda ótip jatqan túsirý jumystaryna negizgisi bar, qosalqysy bar 300-ge tarta akter jumyldyrylǵan.

Fılm túsirilimi 4 aı buryn bastalǵan bolatyn. Serıalda handyqty negizin qalaǵan bas keıipkerlerdiń qatarynda Asan Qaıǵy men Qaztýǵan jyraý da bar. «İshki saraıdyń ıntrıgasyna bul kisi qatysqan. Osy qazaq handyǵynyń qalyptasýynda, noǵaı-qazaqtyń ydyraýynda ózindik bir róli bolǵan, sol kezdegi kóshbasshy, kósemderdiń biri bolǵan adam. Óte bir jaqsy ról dep oılaımyn. Osy róldiń maǵan buıyrǵanyna men óte qýanyshtymyn», – deıdi Qaztýǵan jyraý rólin somdaýshy Bekbolat Tileýhan.

«Jeltoqsannyń orta belinde búkil materıaldy túsirip bitemiz degen oıdamyz. Aldyn ala bárin aıta almaımyn. Óte kúrdeli joba. Halyqtyń aldynda, eldiń aldynda masqara bolmaı, kádimgi durys deńgeıde, aýyz toltyryp aıtatyndaı qyp jasaǵymyz kep otyr», – deıdi «Qazaq eli» fılminiń rejıseri Rústem Ábdiráshev. Senarı boıynsha 10 serıaly fılm Kereı men Jánibektiń Ábilqaıyr hannan bólinýinen bastalyp, Jánibektiń taqqa otyrýymen bitedi. Ári qaraı jalǵastyrý úshin úshin demeýshi qajet. Túsirýshiler fılmge dep bólingen bir mıllıard teńgeniń osy on serıaǵa ǵana jetetinin aıtady.

Darhan Muqan