Keshe Astana qalasynda jol-patrýldik polısıa qyzmetkerin mas júrgizýshi kólikpen súıretken. Bul týraly «Qamshy» portaly BNews.kz-ke silteme jasap habarlaıdy.
Astana qalasy İİD jol-potrýldik polısıa polkiniń qyzmetkeri aǵa serjant Baǵlan Qarymbaev qyzmet baby kezinde saǵat 17.00 shamasynda Lada Kalina avtokóligin toqtatady. Toqtatýǵa atalmysh kóliktiń joldyń qarsy betine shyǵyp ketýi sebep bolǵan.
Qujattaryn kórsetý talap etilgende, júrgizýshi oqıǵa ornynan qashyp ketpek bolady. Astana İİD baspasóz qyzmetinen habarlaǵandaı, polısıa qyzmetkeriniń zańdy talabyna baǵynbaǵan júrgizýshi kóligin otaldyryp, ornynan qozǵalyp ketken.
«Polısıanyń aǵa serjanty B.Qarymbaev ornynan qozǵalǵan kóliktiń rýlinen ustalyp, tártip buzýshyny toqtatpaq bolady. Júrgizýshi jyldamdyǵyn esh tómendetpesten polısıa qyzmetkerin kelesi jol qıylysyna deıin súırep barǵan. Ómirin qaterge tigip, dene jaraqatyn alǵanyna qaramastan, polıseı aqyry tártip buzýshyny toqtata aldy», – dep habarlady İİD-den.
Medısınalyq kýálandyrýdan ótken soń júrgizýshiniń mas ekeni anyqtaldy. Sonymen qatar, ustalǵan azamattyń Qostanaı oblysynyń 38 jastaǵy turǵyny ekeni, buǵan deıin birneshe ret isti bolǵany jáne Qyzylorda oblysynda qylmys jasaǵany úshin izdeýde júrgeni belgili boldy.
Ustalǵan azamat sot sanksıasymen qamaýǵa alynyp, ýaqytsha ustaý abaqtysyna jabyldy. İİD Tergeý basqarmasy Qylmystyq kodekstiń 380-babymen (bılik ókiline ómirine nemese densaýlyǵyna qaýip tóndiretin zorlyq kórsetý) tergeý jumystaryn júrgizip jatyr.
Tártip buzýshynyń asa qaýipti jol-kólik oqıǵasyn jasaýyna jol bermegen jol-patrýldik polısıasy jasaǵynyń qyzmetkeri aǵa serjant Baǵlan Qarymbaev medısınalyq kómek kórsetý úshin aýrýhanaǵa jetkizildi.
