«Almaty» telearnasyndaǵy «İskerler ýaqyty» baǵdarlamasyna shaqyrylǵan ekonomıs Maqsat Seráli Qazaqstanda AQSH dollarynyń quny qansha teńgege deıin kóteriletini týraly boljamdarymen bólisti. Bul týraly «Qamshy» portaly «Almaty» telearnasyna silteme jasap habarlaıdy.
«Ulttyq banktiń tóraǵasy aýysqandyǵy barshaǵa málim. Osy ýaqytqa deıin burynǵy basshy Q. Kelimbetov teńgeni ustap turý úshin belgili-bir qarajatty kúndelikti satyp jáne satyp alyp otyrǵan. Qazirgi tańda jańa basshy aýysqannan keıin bul proses toqtatyldy. Endi teńgeni tolyq erkin aınalymǵa jiberý josparlanyp otyr. 1-2 kúnniń ishinde Ulttyq banktiń jańa tóraǵasy baspasóz májilisin uıymdastyryp, óziniń saıasatyn ashyq túrde halyqqa jetkizedi. Sol kezde Ulttyq banktiń tóraǵasynan bolashaqqa josparlanǵan josparyn kóre alamyz», – deıdi Maqsat Seráli.
Ekonomısiń aıtýynsha, qazirgi tańda dollar baǵamynyń ósýi zańdy.
«Dollardyń ósýi zańdy. Óıtkeni, osy ýaqytqa deıin munaıdyń baǵasy tómendep kele jatyr. Iaǵnı, Qazaqstanǵa kiretin ishki kiristiń, dollardyń kólemi azaıǵandyqtan, ishki naryqtaǵy teńgeniń quny tómendeı bastady. Bunyń birinshi sebebi, munaı baǵasynyń tómendeýi. Qazir munaıdyń bir barelli 48 dollarǵa baǵalanýda. Egerde munaıdyń baǵasy ary qaraı tómendeı beretin bolsa, mindetti túrde teńge tómendeıdi. Qazirgi tańda Qazaqstan ekonomıkasyna eń tıimdi bolatyn munaı baǵasy 70-80 dollar tóńireginde, biraq bul kórsetkishke jete qoıǵan joq. Sondyqtan aldaǵy ýaqytta dollarǵa shaqqandaǵy teńgeniń álsizdenýi múmkin», – dedi «İskerler ýaqyty» baǵdarlamasynyń qonaǵy.
Onyń topshalaýynsha dollar baǵamy alda 400-ge jetýi múmkin.
«Dollar qanshaǵa jetip, toqtaıtyndyǵyn naqty aıtýǵa bolmaıtyn shyǵar. Óıtkeni, proses bastaldy jáne júrip jatyr. Dollar baǵamy turaqtaý úshin munaıdyń baǵasy belgilengen deńgeıge kelip toqtaýy kerek. Dollardyń teńgege shaqqan baǵamy 350-360 teńgeden bastalyp, 400-ge de jetýi múmkin», – dedi ol.
