«Ár adam óz pikirin bildirýge quqyly» degen támsildi jıi estımiz. Ádemi-aq sóz. Alaıda, Táýelsiz Qazaq elinde turyp «Qazaqstan Reseıdiń bir gýbernıasy bolýy kerek» degen sózdi ashyq aıtý baryp turǵan arandatýshylyq bolyp esepteledi.
Ókinishke oraı, sońǵy 2-3 jyldan beri Ermek Taıshybekov deıtin sabaz áleýmettik jelige shyǵyp, Táýelsizdigimizge nuqsan keltiretin pikirler aıtýdy ádetke aınaldyryp aldy. Áý basta ultshyldar onyń pikirine «ıt úredi kerýen kóshedi» dep qaraǵan bolatyn. Alaıda, ol munymen shektelmeı júıeli túrde Qazaq eliniń Táýelsizdigine qarsy pikir aıta bastady. Sondyqtan da kezinde qazaq buqaralyq aqparat quraldary bul týraly kóp jazyp, pikir bildirdi. Osynyń nátıjesi bolsa kerek qazirgi tańda Ermek Taıshybekovtyń isin Jambyl oblysy Qordaı aýdandyq soty qarap jatyr. Naqtyraq aıtsaq oǵan «Áleýmettik, ulttyq, rýlyq, násildik jáne dinı arazdyqty qozdyrý» baby boıynsha aıyp taǵylyp otyr. Atalǵan aıypty Almaty turǵyny Botagóz Isaevanyń «Facebook áleýmettik jelisindegi Taıshybekovtiń jazbalary ultaralyq arazdyqty qozdyrady dep sanaımyn» degen aryzy negizinde UQK qozǵap otyr.
Bir qyzyǵy Ermek Taıshybekov sotty keıinge shegerip qýlyqqa basyp jatqan sıaqty. Máselen, sýdıa sársenbi kúni tergeý júrgizý tártibin qaraýdy josparlaǵan bolatyn. Alaıda, sotalýshy «is materıaldarymen tanyspaǵanmyn» degen soń sot otyrysy qarashanyń 9-yna aýystyryldy. Sondaı-aq, sottalýshy sýdıa men prokýrordan qolyn qylmystyq kodekske qoıyp, «sot prosesi kezinde jeke saıası kózqarastarym emes, zańdy ǵana basshylyqqa alamyn» dep ant berýin ótindi. Áıtse de sýdıa aıyptalýshynyń bul ótinishin oryndaýdan bas tartty.
Jalpy sot otyrysynda Ermek Taıshybekov ártúrli orynsyz usynys aıtyp, sýdıany mazaq etip jatqany anyq baıqalady. Buǵan árıne tańǵalýǵa bolmaıdy. Óıtkeni ol Qazaq eliniń terıtorıalyq tutastyǵyna kúmán keltirip, tipti onyń shańyraǵynyń shaıqalýyna múddeli bolyp otyr. Endeshe onyń sýdıany syılamaı mazaq etýi qalypty jaǵdaı emes pe? Sondaı-aq onyń sot otyrysyn keıinge qaldyryp, bultaqtaýy da kezekti qýlyq bolýy múmkin. Bul týraly sot otyrysyna arnaıy baryp qatysqan «Ańyz adam» jýrnalynyń bas redaktory Jarylqap Qalybaı málimdedi.
– Ermek Taıshybekovtiń sotyna Qordaı aýdanyna arnaıy baryp qatystym. Sot belgilengen ýaqytynan 2 saǵatqa kesh bastaldy. Meniń oıymsha Ermek sotty boldyrmaýǵa nemese barynsha keıinge ysyrýǵa baryn salyp jatyr. Máselen sot bastalarda ol sotqa bir talap qoıyp edi, sýdıa sony eki saǵat talqylap, saǵat 17.00-de sot prosesin bastady. Sondaı-aq, Taıshybekov «men bes tomdyq sot materıaldarymen tanyspadym, maǵan tanysýǵa 4-5 kún berińiz» dedi. Onyń neshe túrli bulǵaqty oılap taba bergenine qaraǵanda, onyń astyrtyn jumys istep otyrǵan myqty zań keńesshileri bar sekildi, – deıdi Jarylqap Qalybaı .
Qansha jerden Ermek Taıshybekovtyń astyrtyn qoldap otyrǵan zańgerleri bolsa da sýdıa oǵan tıisti jazasyn berýi kerek. Óıtkeni, «Qazaqstan Reseıdiń bir gýbernıasy bolýy kerek» dep, Qazaq eliniń Táýelsizdigine kúmán keltirgen separatıstik pıǵyldaǵy adamnyń taırańdap júrýine eshqandaı qaqysy joq. Ondaı nıettiler der kezinde anyqtalyp, tıisti jazaǵa tartylýy tıis. Eger biz búgin onyń áreketine kóz juma qarasaq, erteń ondaǵan, tipti júzdegen Taıshybekovter shyǵýy múmkin. Sondyqtan da, el irgesin buzýdy kóksegen Taıshybekov zań boıynsha tıisti jazasyn alýy kerek.
Serik JOLDASBAI
