«Nur Otan» partıasy Ortalyq apparatynda baspasóz ortalyǵy ashyldy. Osyǵan oraı uıymdastyrylǵan brıfıńte partıa Tóraǵasy Birinshi orynbasarynyń keńesshisi Berik Ýálı men partıa Ortalyq apparatynyń basshysy Janat Qojahmetov sóz alyp, sońǵy eki aıda partıada atqarylǵan jumystar jaıly baıandady. Bul týraly «Qamshy» portaly partıanyń baspasóz qyzmetine siltee jasap habarlaıdy.
Óz sózinde Berik Ýálı ashylyp otyrǵan Partıa Baspasóz ortalyǵynyń basty maqsaty Elbasy, «Nur Otan» partıasynyń Tóraǵasy N.Á.Nazarbaev bekitken Bes ınstıtýsıonaldy reformanyń «Ashyq jáne halyqqa esep berýshi memleket» baǵyty aıasynda partıanyń qalyń jurtshylyq aldyndaǵy jarıalylyǵyn qamtamasyz etý bolyp tabylatynyn jetkizdi.
«Partıa ashyqtyq pen aıqyndyq qaǵıdasyn júzege asyrýǵa, kez-kelgen aqparatty ashyq usynýǵa daıyn. Búgingi ashylyp otyrǵan Baspasóz ortalyǵy osyny júzege asyrýdyń bir tetigi», - dedi B.Ýálı.
Partıanyń baspasóz ortalyǵy «Nur Otannyń» jańa medıalyq saıasaty sheńberinde júzege asyp, partıa men buqaralyq aqparat quraldary arasyndaǵy ózara baılanysty nyǵaıtýǵa, bılik partıasynyń halyqtyń ál‑aýqatyn arttyrýǵa baǵyttalǵan is-sharalarynyń oryndalý barysy men saılaýaldy tuǵyrnamasynda berilgen ýádelerdiń iske asýy jóninde aqpar taratatyn alań bolyp qalyptaspaq.
Bekitilgen kestege sáıkes munda apta saıyn brıfıńter ótkizilip, ortalyq apparattyń departament basshylary, fraksıa depýtattary, fılıal tóraǵalarynyń birinshi orynbasarlary, máslıhat hatshylary, bastaýysh partıa uıymdarynyń ókilderi atqarylyp jatqan jumystar jóninde esep beretin bolady. Qajet bolǵan jaǵdaıda partıanyń brıfıń alańyna ózekti máseleler boıynsha memlekettik organ jetekshileri de shaqyrylyp, pikirleri tyńdalmaq.
Partıa Tóraǵasy Birinshi orynbasarynyń keńesshisi atap ótkendeı, Elbasy, Partıa Tóraǵasy júktegen mindetterdi iske asyrýda, óńirlerdegi jumysty kúsheıtýge basymdyq berilip otyr. Sonymen qatar, qoǵamdaǵy ózekti máselelerge saraptama júrgizilip, 13 partıalyq joba 8 jobaǵa biriktirildi. Oǵan qosa, eki joba qolǵa alynyp otyr. Elbasynyń «Uly Dala Eli» ıdeıasy aıasynda rýhanı qundylyqtardy dáripteý, urpaqtar tárbıesi máselelerin nasıhattaýǵa kóńil bólinip otyr. Osy joba sheńberinde partıalyq BAQ-ta «Uly Dala ósıeti» aıdarymen elimizdiń ejelgi zamannan bergi tarıhyndaǵy orny erekshe uly oıshyldardyń naqyl sózderin, tálim-tárbıelik mańyzy bar ósıetterin óskeleń urpaq sanasyna sińirý maqsatyndaǵy beınerolıkter kórsetilip, arnaıy aıdarlar ashylýda. Basylymdarda qoǵamdyq qabyldaý bólimderine kelgen azamattardyń ótinishteriniń oryndalý barysyna arnalǵan, «Erkin minbe» («Svobodnaıa trıbýna»), «Bılik nazaryna» aıdarlary ashylǵan.
Al partıa qabyldap otyrǵan ekinshi jańa joba aýyldaǵy jumyssyzdyq máselesin sheshýge baǵyttalyp, otbasylyq sharýalarǵa qoldaý kórsetý júıesin qurýdy kózdeıdi. Osy arqyly aýylsharýashylyǵyn ilgeriletý josparlanýda.
«Nur Otan» partıasy Ortalyq apparatynyń basshysy J.Qojahmetov Elbasy, partıa Tóraǵasy N.Á.Nazarbaevtyń qoıǵan mindetteri aıasynda partıada halyqpen jumysty nyǵaıtý, partıalyq baqylaý men óńirlik jumys tıimdiligin arttyrý jóninde atqarylǵan jumystar jaıly habarlady. Atap aıtqanda, Ult josparyn zańnamalyq turǵydan qamtamasyz etý boıynsha Májilistegi partıa fraksıasyna kelip túsken 62 zań jobasynyń 59-y maquldanyp, 1 qarashadaǵy málimetke sáıkes Parlamentte 36 zań jobasy qabyldanǵan. Oǵan qosa, ózekti máseleler boıynsha óńirlerden Ortalyq apparatqa kelgen usynystar saralanyp, Parlament Májilisiniń jumys toptaryna jetkiziletinin aıtty.
Sondaı-aq, «Nurly jol» baǵdarlamasynyń júzege asyrylýyn baqylaý jóninde Májilis pen máslıhattardaǵy partıa fraksıalary janynda 4 komısıa qurylǵanyn aıtty. Aldaǵy ýaqytta agroónerkásiptik keshenine qatysty taǵy bir komısıa qurylatynyn da habarlady.
Oǵan qosa qoǵamdyq qabyldaý bólmeleri men «Elektrondy partıa» halyqpen keri baılanystyń nyǵaıa túsýine yqpal etken. Eki jylda memlekettik organdardyń jetekshileri men depýtattardyń azamattardy jeke qabyldaýlarynyń sany 8 ese ósken. Shaǵymdardyń árbir altynshysy elektrondy túrde qabyldanady. Parlament Májilisindegi partıa Fraksıasynyń múshelerine tikeleı ótinish jiberýge múmkindik beretin «Depýtat blogy» qyzmet etip turǵany da aıtyldy.
Partıanyń Ortalyq apparatynda oryn alǵan ońtaılandyrýdyń nátıjeleri jaıly aıtyp ótti. Budan buryn partıa Tóraǵasynyń Birinshi orynbasary A.Myrzahmetov habarlaǵandaı, 1 qarashadan bastap, partıanyń Ortalyq apparaty men óńirlik fılıaldar jańa shtat kestesi boıynsha jumys atqara bastady. Osylaısha, ortalyqta qyzmetkerler sany 132-den 116-ǵa deıin qysqaryp, óńirlik fılıal qyzmetkerleriniń sany 43%-ǵa, ıaǵnı 358 birlikke kóbeıgen. Fılıaldardyń jumys sapasy men tıimdiligin baǵalaýdyń nysanaly ındıkatorlary ázirlenip, kelesi jyldan bastap qoldanýǵa josparlanyp otyrǵanyn da aıtty Ortalyq apparat basshysy.
