Partıanyń jańa baspasóz ortalyǵynyń ashylýynda jýrnalıserdiń saýalyna jaýap bere kele partıa Tóraǵasy Birinshi orynbasarynyń keńesshisi Berik Ýálı joǵaryda atalǵan máselege qatysty partıa janyndaǵy «Mıras» qoǵamdyq keńesi tarapynan óńirlerge usynym-hat joldanýy qarastyrylǵanyn málimdedi.

«Eń qasterli merekemiz – Táýelsizdik kúni merekesi atalyp ótetin 16 jeltoqsan ótkenshe Jańa jylǵa daıyndyqty bastamaý máselesi qoǵamda talaı jyldan beri talqylanyp keledi. Sońǵy birneshe jylda Ońtústik Qazaqstan oblysy osyndaı bastama kóterip, ol basqa óńirlerde de qoldaý tapty. Osy oraıda biz bul máselege «Mıras» Qoǵamdyq keńesi arqyly yqpal etýdi jón kórip otyrmyz. Keńeske elimizge tanymal zıaly qaýym ókilderi múshe ekenin bilesizder. Búginde «Mıras» qoǵamdyq keńesiniń atynan keńes músheleriniń qoly qoıylǵan hat ázirlenýde. Aldaǵy ýaqytta ony óńirlerdiń ishki saıasat basqarmalaryna joldaýdy qarastyryp jatyrmyz», - dedi B. Ýálı.

Esterińizge sala keteıik, búgin, 6 qarasha kúni «Nur Otan» partıasynyń Ortalyq apparatynda Baspasóz ortalyǵy ashyldy.

Ortalyqtaǵy alǵashqy brıfıńte partıa Tóraǵasy Birinshi orynbasarynyń keńesshisi Berik Ýálı men partıa Ortalyq apparatynyń basshysy Janat Qojahmetov sóz alyp, sońǵy eki aıda partıada atqarylǵan jumystar jaıly habarlady.

Bekitilgen kestege sáıkes munda apta saıyn brıfıńter ótkizilip, ortalyq apparattyń departament basshylary, fraksıa depýtattary, fılıal tóraǵalarynyń birinshi orynbasarlary, máslıhat hatshylary, bastaýysh partıa uıymdarynyń ókilderi atqarylyp jatqan jumystar jóninde esep beretin bolady. 

Esterińizge salsaq, Táýelsizdik kúni qarsańynda el aýmaǵynda Jańa jyl merekesine qyzý daıyndyq bastalyp ketetini, sonyń saldarynan elimizdiń bas merekesi tasada qalatyny týraly maqala «Qamshy» portalynda  jarıalanǵan bolatyn.  Maqala avtory onda kópshilikke «Nur Otan» basshylyǵyna barǵan A. Myrzahmetov myrza Táýelsizdik kúnine deıin el aýmaǵynda shyrsha tigýdi toqtata ala ma?» degen saýal tastaǵan edi.