QR-y Parlament Májilisiniń depýtaty, Aýǵan soǵysy ardagerleriniń «Qazaqstan ardagerleri» qaýymdastyǵynyń tóraǵasy, aqyn Baqytbek Smaǵul osyndaı usynys aıtty. Bul týraly «Qamshy» portaly QazAqparatqa silteme jasap habarlaıdy.

Almatydaǵy B.Momyshuly atyndaǵy respýblıkalyq áskerı mektep-ınternatta batyr eskertkish-músininiń ashylý saltanatyna kelgen depýtat Abaı dańǵylynyń Baýyrjan momyshuly kóshesimen qıylysqan tusynda ashylǵaly jatqan jańa metro stansasyna Keńes Odaǵynyń batyry, maıdanger jazýshy Baýyrjan Momyshulynyń esimin berýdi usyndy.

Onyń aıtýynsha, bul usynys eger oń sheshimin tabar bolsa, Uly Jeńistiń 70 jyldyǵyna oraı, Baýyrjan Momyshulynyń ǵana emes, sol surapyl soǵysta qan tókken barsha jaýynger ata-babalarymyzdyń rýhyna jasalǵan zor qurmet bolar edi.

«Bul qadam syrt kózge ses, al urpaǵymyzǵa es bolar edi. Kezinde, 2010 jyly Halıla Omarov ekeýmiz «Qazaqtyń Baýyrjany» degen derekti fılmdi túsirý úshin Máskeýge barǵan kezimizde Volokolamsk qalasynyń ákimi Vasılıı Shýlepov: «Uly Otan soǵysynda mıllıondaǵan jaýynger soǵysty. Biraq, qazaq halqynyń qaısar rýhty uldarynyń arqasynda fashıser Máskeýdi basyp ala almady», - degen bolatyn. Máskeýde «Almaty» metro beketi bar, al, Almatydaǵy jańa metro beketteriniń biri «Máskeý» dep ataldy. Bul, eki el arasyndaǵy dostyqtyń altyn kópiri ispettes. Sondyqtan, dostyqtyń shekarasynda shek bolmasyn, arada ótken oqıǵalardan kek bolmasyn, urpaq sabaqtastyǵy jalǵassyn desek, jańadan salynyp jatqan metro beketine Baýyrjan Momyshulynyń esimin bergen jón. Bul usynysty Almaty qalasynyń ákimdigi qup kóredi degen úmittemin», - dedi B. Smaǵul.