«Nur Otan» partıasy bolashaqta óz músheleriniń sanyn 100 myńnan asyrýdy josparlap otyr. Sońǵy málimetterge sáıkes, qazirgi tańda respýblıka boıynsha «Nur Otan» partıasynyń quramynda 870 myńnan astam múshe bar. Bul týraly «Qamshy» portaly «Nur Otan» partıasy Ortalyq apparatynyń Uıymdastyrý-baqylaý jumysy departamentine silteme jasap habarlaıdy.

«Eń negizgi basymdyq ekonomıkalyq salaǵa qoıylmaq. Osyny eskere otyryp, partıa quramynyń sapasyna taldaý jasaldy. Osyǵan oraı, ekonomıka men shaǵyn jáne orta bıznes salalaryna erekshe kóńil bólý kerektigi anyqtaldy. Statısıkalyq málimetterge sáıkes, bizdiń elde ekonomıkalyq belsendi 9 mıllıon adam bar, olardyń 2 mıllıonnan astamy - shaǵyn jáne orta bızneste júr. Olardyń ishinde «Nur Otan» partıasynyń músheliginde turǵandar 1 paıyzdan sál asady. Al, medısına, bilim berý, mádenıet salalarynda jumys isteıtin ekonomıkalyq belsendi halyqtyń 1,5 mıllıonyna da jetpeıdi, deı turǵanmen onda bizdiń partıanyń músheleri jeterlik. Ekonomıka salasynda bizde 3 mıllıonan astam adam bar, alaıda «Nur Otan» partıasynyń músheleri onyń 19-20 paıyzyn ǵana quraıdy. İshki partıalyq jumysty dál osy salalarda kúsheıtý qajettigi týyndap otyr», - deıdi departament dırektory Jiger Qalıev partıanyń Ortalyq apparatynda ótken baspasóz máslıhatynda.

Onyń aıtýynsha, qoǵamdyq qabyldaýdyń tıimdi jumysynyń arqasynda qazirgi ýaqytta partıa qataryna ótemin degenderdiń sany artyp otyr.

«Osyǵan qaramastan, partıa músheler sanyna emes, sapasyna qaraıtyn bolady. Bizde ózderimizdiń talaptarymyz bar. Sonyń negizinde biz partıaǵa eń laıyqty degen azamattardy qabyldaıtyn bolamyz. Demek, bizde sapa turǵysynan kelgende óte joǵary talaptar qoıylmaq», - deıdi J.Qalıev.